Dopo des Predicjis dal muini di pre Josef Marchet, letis di Fabiano Fantini, la Societât Filologjiche e propon la leture di une altre opare di fonde de leteradure in lenghe furlane, Par un pêl: l'atôr Massimo Somaglino al lei lis contis di Riedo Puppo ogni sabide aes 13.40 par dîs setemanis fin ai 5 di Avost su Radio Rai FVG.
Par un pêl e je la opare che e à fat cognossi di plui Riedo Puppo (Sarsêt 1920 - Udin 2022): un patrimoni de culture furlane e, te sô perfezion linguistiche, un test di riferiment de nestre marilenghe. Une opare che - al à vût scrit pari David Maria Turoldo - e varès meretât il miôr premi di narative in Italie, se i talians a vessin podût lei il furlan.
In chest libri si cjate dut chel mont furlan che i stave a cûr al autôr: ogni conte e piture un trat particolâr de culture furlane, a saltin fûr lis lidrîs de nestre identitât e anzit, se letis insot, chestis storiis a deventin un salteri antropologjic dal Friûl e dai furlans: in pocjis riis si pues nulî la vite di paîs, di comunitât, e i valôrs che le tignivin in pîts. Cjossis di une volte, si disarès. Veretâts di fonde, invezit, che a coventin par misurâ la temperadure de vite di vuê.
Tal 2022, pai 20 agns de muart di Riedo Puppo, la Societât Filologjiche Furlane e à tornât a publicâ Par un pêl, inte golaine "Scritôrs dal Friûl", in colaborazion cul Comun di Murùs e cu la famee Puppo (viôt tai links in cheste pagjine).
Buine scolte!