Riedo Puppo al è il scritôr par furlan plui let in Friûl. Al è stât arlêf di pre Bepo Marchet e scritôr dal circul leterari di "Risultive": la sô lenghe e je vivarose, precise, sclete e cence retoriche, cuinçade cuntune buine misure di umorisim. La sô opare plui cognossude e je cence dubi Par un pêl, publicade pe prime volte tal 1960 e tornade a stampâ plui voltis. A son 34 piçulis contis che a partissin di ce che al sucêt inte vite di ogni dì par lâ insot intes lidrîs de culture furlane.
Lis contis a son letis dal atôr Massimo Somaglino e cumò si pues scoltâlis sul sît www.techefurlane.it, che al cjape dentri un grant patrimoni documentari e bibliografic di libris, articui, fotografiis, stampis, materiâi multimediâi, ducj catalogât e digjitalizâts, di podê consultâ in maniere une vore semplice.