La Societât Filologjiche Furlane e je partner dal progjet Incuintri di culturis: Nature cence confins, che al previôt la organizazion di un festival inovatîf inte zone transfrontaliere di Gnova Guriza e Guriza, metint adun diviers setôrs culturâi cun atenzion particolâr a la leterature ecologjiche.
Il festival al è inmaneât di bande da lis associazions Zveza kulturnih društev Nova Gorica e Porte a Nordest e al previôt ativitâts di musiche, teatri, danze e bielis arts.
L’obietîf al è chel di sensibilizâ la int su lis cuistions ecologjichis a traviers di oparis leterariis e esibizions artistichis, cjapant dentri autôrs dal passât e dal presint.
Si vûl meti lis lidrîs par un festival anuâl, partint da la prime
edizion (2024) che e à par teme il paisaç, biel che la seconde (2025) e
sarà sul teme da l’aghe viodût a traviers di diviersis oparis
leterariis.
La colaborazion tra Italie e Slovenie e judarà a meti sù un ecosisteme culturâl transfrontalîr in preparazion di GO 2025.
Inte suaze di chest progjet sabide ai 16 di Novembar a lis 8 e mieze di sere li dai Cjasâi Zorutti di Lonzan (Dolegne) al sarà il conciert corâl Soi nassùd a Lonzàn. Peraulis e musiche par Pieri Çorut, un percors musicâl a traviers da lis poesiis dal innomenât poete furlan dal Votcent, di Marko Kravos, Leonardo Zanier e Rainer Maria Rilke.
Il program al previôt “Intervalli del tempo” di Alessio Domini in trê timps e “ouverture” par corâl masculine, armoniche e violoncel cu la leture di “Sol na jezik” di Kravos, “Crìstal” di Zannier e “Spiegel” di Rilke. Dopo a vignaran sunadis lis musichis di Valter Sivilotti componudis sui tescj dal “Strolic” di Çorut.
Il grop corâl al sarà il Coro Natissa di Aquilee direzût di Luca Bonutti, cul compagnament di Sebastiano Zorza (armoniche), Cristina Nadal (violoncel), Marko Feri (ghitare), Mauro Meroi (liron), cu la vôs soliste di Dorina Leka e la narazion dal atôr Fabiano Fantini.
Jentrade libare.