La XCVII cunvigne anuâl di studis de Deputazion di Storie Patrie pal Friûl, che e colabore ancje la Societât Filologjiche Furlane, e je dedicade al 150n aniversari de nassite di Pier Silverio Leicht (1874-1956).
Leicht al è stât un jurist, storic e bibliotecari talian. Diretôr de Biblioteche civiche di Udin dal 1900 al 1902, tal 1911 al promovè la fondazion de Societât furlane di storie patrie; al è stât president e al à mantignude la incarghe ancje cuant che, tal 1919, de Societât e je nassude la Deputazion di storie patrie pal Friûl, che al à vuidât fin al 1935. Dal 1925 al 1945 al è stât ancje dean de Societât filologjiche furlane, ricognossude ent morâl tal 1936 in gracie dal so impegn.
Cundiplui dal 1927 al 1932 al è stât president de Societât alpine furlane.
La cunvigne, che e vûl ricuardâ un studiôs cetant impuartant pe promozion dai studis storics in Friûl, si davuelzarà in Palaç Mantica in vie Manin 18 a Udin ai 24 e ai 25 di Otubar dal 2024.
Il program si pues discjamâlu a la vôs download in cheste pagjine.