Stant ae tradizion, ai 28 di Otubar a Codroip si è davuelte la cerimonie di premiazion dal premi San Simon, rivât ae sô edizion numar 46 e organizât dal Comun di Codroip, in colaborazion cu la Societât Filologjiche Furlane, la ARLeF, l’Istitût Ladin Furlan “Pre Checo Placerean” e l’Ent Friûl intal Mont.
Pe sezion contis il premi nol è stât assegnât, ancje se la jurie, li che si son dâts dongje Martina Delpiccolo, Maurizio Mattiuzza e Paolo Patui, e à segnalade la racuelte “Lis contis sot des stelis” di Roberto Meroi.
La sezion Traduzion invezit e je stade vinçude di Rem Spicemei, che cu lis sôs versions furlanis des contis “Villa veneta” e “Tornato per votare” di Elio Bartolini al à cjatât il benstâ di dute la jurie, componude di Gottardo Mitri, Paolo Cantarutti e Flavio Santi, cun cheste motivazion: «l’autôr al pant paronance da la lenghe; al à savût distacâsi di une traduzion leterâl tant di rivâ a un risultât di leture dulà che il letôr al è puartât a man te atmosfere reâl da lis contis intune maniere curade e lizere».
La opare, che e ten dentri un aprofondiment su la figure di Bartolini firmât di Silvia Polo, assessore ae Culture e presidente onorarie des dôs juriis, e je stade publicade de Societât Filologjiche Furlane e e vignarà dade fûr a ducj i socis midiant de prossime spedizion de riviste “Sot la Nape”.
Cun di plui, ducj i interessâts le podaran cjatâ alì de Biblioteche di Codroip e intes sedis de Filologjiche.