Dopo che e je stade sierade par vie de emergjence Covid19, cui 19 di Mai la Biblioteche de Societât Filologjiche Furlane, inte sede di vie Manin 18 a Udin, e à tornât a vierzi in dute sigurece, lant daûr des liniis dadis fûr a nivel regjonâl e nazionâl.
Par cumò
la Sale Consultazion e reste sierade al public. Al sarà in funzion dome il servizi di prestit e restituzion dai libris e dome su apontament, clamant il numar 0432-501598 int. 2 o pûr scrivint a biblioteca@filologicafriulana.it.
Par vê un libri in prestit si à di prenotâlu
on line, par telefon o par e-mail.
Si podarà jentrâ in biblioteche dome un a la volte, cun intor la mascarute e dopo vê igjenizât lis mans midiant dal disinfetant metût di pueste a disposizion tal ingrès. L’utent al varà di spietâ di ricevi il libri ch’al à domandât tal spazi li che la bibliotecarie i disarà di stâ. La stesse procedure e vâl pe restituzion dal libri.
La bibliotecarie e varà sù une mascarute e i guants.
I libris che a tornin in sede a restaran in isolament par 72 oris.
Ogni utent al varà di jemplâ e sotscrivi une autodeclarazion su eventuâi sintoms, contats o infets relatîfs al Covid19.
Al reste atîf, e par di plui al è stât potenziât, l’acès aes risorsis
on line. Dai catalics in linie si puedin consultâ e discjamâ in formât PDF i articui des
Rivistis Furlanis e dai
Numars Unics e viodi lis fotografiis dal
Font Pellis e dal
Font Cartulinis.
E je ative la consulence bibliografiche, par e-mail o telefon, par vê indicazions su lis risorsis disponibilis in linie pe consultazion e l’acès ancje stant cjase o par recuperâ documents in formât digjitâl, tal rispiet des leçs in vore e dal regolament de Biblioteche.