Ai 27 di Zenâr dal 2021 e je stade rinovade la convenzion jenfri la Fondazion Friuli e la Societât Filologjiche Furlane, che e conferme e e rinfuarce il rapuart di colaborazion jenfri chestis dôs Istituzions.
A son passe vincj agns, aromai, che la Fondazion e puarte indenant cu la Societât Filologjiche iniziativis e azions di promozion de culture regjonâl; tra chestis o ricuardìn par esempli la publicazion dal diari Olmis pe scuele primarie e l’edizion dai Numars Unics dedicâts aes localitâts furlanis ch’a dan acet ai Congrès dal Sodalizi.
Vê rinovade cheste convenzion al è un segnâl impuartant de volontât di lâ indevant insiemi, tal rispiet dai obietîfs e des carateristichis istituzionâls, su la strade de produzion, promozion e disvilup di progjets culturâi e artistics sul teritori.