Dut pront pe IX edizion de Scuele di Avost, la Summer school indreçade ai docents di ducj i grâts e di dut il Friûl, inmaneade de Societât Filologjiche Furlane midiant dal Docuscuele - Centri regjonâl di documentazion ricercje e sperimentazion didatiche pe scuele furlane, cul contribût de Regjon, il patrocini di ARLeF - Agjenzie Regjonâl pe Lenghe Furlane, Universitât dal Friûl e Ufici Scolastic Regjonâl e in colaborazion cul Museu Archeologjic Nazionâl di Aquilee e cu la sede RAI pal FVJ.
Daûr de filosofie dai agns passâts, che e intint di ufrî buinis pratichis pe didatiche intune cu la valorizazion dal teritori, ancje chest an la formazion e vignarà fate in trê sedis diferentis, intes zornadis dai 22, 25 e 26 di Avost.
E sarà duncje une scuele torzeone, che e menarà i partecipants ae scuvierte dal Museu Archeologjic di Aquilee e des sedis de Societât Filologjiche Furlane di Udin e Gurize, ven a stâi Palaç Mantica e Cjase Ascoli.
Il program al tacarà duncje a Aquilee vinars ai 22 di Avost, aes 9 di buinore, alì dal Museu Archeologjic Nazionâl (vie Rome, 1), cul intervent de diretore dal museu, Marta Novello, e la visite par cure di Elena Braidotti, ae scuvierte dal percors espositîf gnûf, de ufierte formative pes scuelis e dai materiâi didatics plurilengâi “Il Museu in zûc”, realizâts te suaze dal progjet Primis Plus, finanziât de Regjon. Cun di plui, la ilustradore di nomee internazionâl Barbara Jelenkovich e mostrarà ancje cemût doprâ cun finalitât didatiche la publicazion in cuatri lenghis “Il tesaur di Aurelianus”.
La formazion e larà indenant lunis ai 25 di Avost, intal Salon di onôr di Palaç Mantica a Udin (vie Manin 18), a tacâ des 9 e un cuart di buinore.
Daspò dai salûts dal President de Filologjiche, Federico Vicario, a vignaran presentadis lis gnovis unitâts didatichis di aprendiment dal progjet “Saperi al setaccio”, par cure di Linda Facini, Anna Zossi, Tamara Pozzebon e Donatella Bello. E coordenarà la buinore Ada Bier, ricercjadore furlane intal Paîs Basc. Il daspò misdì al sarà invezit dedicât al Olmis, il diari torzeon par cognossisi e fâsi cognossi, che di passe trente agns i fâs compagnie ai fruts des scuelis primariis e che chest an al è dedicât ae Protezion Civîl e ai 50 agns dal Orcolat. Spazi ancje ai prodots pe infanzie, cu la presentazion di Buine gnot Teo / Buonanotte Teo / Good night Theo e il laboratori par cure di Barbara Jelenkovich, autore des ilustrazions. Par sierâ, Arianna Zani de RAI FVJ e mostrarà i prodots televisîfs in lenghe furlane realizâts pai plui piçui, tant che imprescj pe didatiche a scuele. Al vignarà proponût ancje il laboratori “L’ABC dal dopleadôr”.
La ultime zornade de Scuele di Avost e sarà a Gurize martars ai 26 di Avost, cu la buinore dedicade ae visite de citât cu la vuide di ecezion di Feliciano Medeot, diretôr de Filologjiche, ae scuvierte di lûcs che a contin la storie di une tiere di frontiere. Il daspò misdì invezit al sarà dedicât al Dizionario dei Goriziani di Elisa Brumat e ae mostre permanente Lis lenghis di Gurize in Cjase Ascoli.
Ducj i incuintris a son sore nuie e increditâts daûr des liniis vuide dal MIM.
Si pues partecipâ ancje dome a une part dal percors formatîf o ben a ducj i incuintris, baste notâsi dentri dai 21 di Avost midiant de schede di iscrizion di mandâ a la direzion info@scuelefurlane.it.
Dutis lis informazions a son tal sît www.scuelefurlane.it