Si è sierade cuntun belanç une vore positîf la
Setemane de culture furlane – Settimana della cultura friulana inmaneade de Societât Filologjiche Furlane, che dai 18 ai 28 di Otubar e à proponût un program vivarôs cun plui di sessante events. Tancj di chei si son tignûts, pe prime volte, ancje in
streaming cussì di rivâ a tancj furlans sparniçâts ator pal mont, ancje in graciis de colaborazion cun Ente Friuli nel Mondo.
La plui grande gnove di cheste VII edizion, ch’o varessin vût di fâle come par tradizion tal mês di Mai ma o vin tornât a metile in program par Otubar, e je stade di fat la pussibilitât di seguî in direte streaming tancj events dal sît de manifestazion
www.setemane.it
Une sielte ch’e je stade pardabon providenziâl daûr dai ultins decrets ministeriâi dâts fûr in Otubar, stant che cussì o vin podût recuperâ in linie cualchi event che no varessin podût fâ in presince di public. In curt, simpri sul sît de Setemane, a vignaran cjamâts ducj i intervents mandâts in linie, cussì che ducj a puedin tornâ a viodi i contignûts che ur interessin di plui.
Tra i events o nomenìn in particolâr il ricuart dal professôr Gianfranco D’Aronco a un an de muart, cu la presentazion de sô “Autobibliografia degli scritti (1941-2019)” publicade inte golaine “Biblioteca degli studi linguistici e filologici”. Ancje la tradizionâl
Fraie, la nestre fieste sociâl che chest an no je stade “de Vierte” ma “de Sierade” e ch’e varès vût di tignîsi a Vît domenie ai 25 di Otubar, le vin fate invezit in linie. Cussì ancje la cerimonie di premiazion de 41me edizion dal Premi San Simon, il plui grant premi leterari in lenghe furlane, promovût dal Comun di Codroip e che miercus ai 28 di Otubar al à sierât l’edizion 2020 de Setemane.
Tra i events che a àn vût plui sucès, jenfri chei che si son tignûts in linie, o nomenìn i ricuarts di Enzo Bearzot a dîs agns de muart, cun ospits preseâts tant che Bruno Pizzul, Franco Causio e Dino Zoff, dal scritôr Riedo Puppo tai cents agns de nassite, cul coordenament di Federico Rossi, de studiose di tradiazions popolârs Andreina Nicoloso Ciceri tai 20 agns de muart, cun Cristina Noacco e Gian Paolo Gri. A son stâts ancje ricuardâts, tai 250 agns de muart, doi grancj furlans che ur son intituladis dôs des scuelis superiôrs plui impuartantis di Udin: Jacopo Stellini e Antonio Zanon.
Tra i events in presince o ricuardìn il conciert “La Cerva Savorgnana di Luigi Pozzi” a Vençon inmaneât de Associazion “Amici di Venzone”, la proiezion dai documentaris “Il Friuli perduto” di Giorgio Trentin tal Teatri sociâl di Glemone par cure de Cineteca del Friuli e lis visitis vuidadis multimediâls ae scuvierte di “Gorizia nascosta” cul CTA di Gurize.
Un ringraciament particolâr ur va ai tancj ents, associazions e istitûts culturâi dal nestri teritori che, pûr cu lis dificoltâts leadis a chest moment di emergjence sanitarie, a àn partecipât cun entusiasim ae “Setemane” e nus àn judât ancje chest an a meti adun une propueste culturâl siore e vivarose.