Ai 17 di Lui dal 1943 al murive Ugo Pellis, prin promotôr e realizadôr de fondazion de Societât Filologjiche Furlane e president dal 1920 al 1923.
Al jere nassût ai 9 di Otubar dal 1882 a San Valantin di Flumisel e chest an, in Sierade, propit il Comun di Flumisel La Vila al darà acet al XCVII Congrès de Filologjiche.
O ricuardìn Ugo Pellis tant che lenghist, leterât, fotograf. Al è stât intervistadôr unic pal
Atlant lenghistic talian (ALI) e dal 1925 al 1942 al à fat 730 inchiestis dialetologjichis in dute Italie, comprendudis la Istrie e la Dalmazie. Cun chê di documentâ pal miôr il materiâl lenghistic cjapât sù, al à fat cetantis fotografiis e cussì al à metût adun un
archivi visîf ecezionâl (passe 7 mil imagjinis) che al conte la vite di ogni dì de Italie ‘minôr’ tai agns Vincj e Trente dal Nûfcent.
La grande imprese dal ALI e à ispirât il docufilm
L'Atlante della Memoria, pe regjie di Dorino Minigutti, presentât in anteprime pal Centenari de Societât Filologjiche Furlane e in program juste apont pal Congrès 2020. In chê ocasion o presentarìn ancje il Numar Unic "Flumisel La Vila", par cure di Ferruccio Tassin. In curt o publicarìn il program dal Congrès.