Il Comun di Guriza, cu la delibare di Zonte 409 dai 18 di Dicembar 2025, al à metût adun une Taule permanente pe tutele da la lenghe minoritarie furlane. Cheste Taule e je un organisim partecipatîf di colegament tra la popolazion di lenghe furlane e la aministrazion comunâl e di confront sui problemis di caratar sociâl, culturâl, economic che a rivuardin la vite da la minorance linguistiche furlane e la sô libertât tal afermâsi dentri da la comunitât e su cuistions specifichis peadis a events o fats particolârs.
“Une carateristiche uniche da la nestre citât e je la grande ricjece linguistiche – al à metût in lûs in sindic Rodolfo Ziberna – e par chest e je nassude la idee di meti adun cheste Taule tant che imprest di confront”. A àn cjapât part a la presentazion ancje l’assessôr comunâl a lis minorancis linguistichis Maurizio Negro, che al à metût in lûs il caratar a tiermin lunc dal progjet, la dirigjente dal setôr Antonella Manto e il president da l’Arlef, Eros Cisilino. A jerin presints ancje il vicepresident da la Societât Filologjiche Furlane pal Gurizan, Renzo Medeossi, e il president da la consulte des associazions di Luzinìs, Gianni Bressan.
La Taule e podarà segnalâ a la aministrazion i câs li che si riten che la minorance linguistiche e vedi prejudizis o limitazions a la sô libertât di afermazion. E podarà ancje promovi e puartâ indevant studis e ricercjis su aspiets che si riferissin a la presince e al rûl da la minorance linguistiche intal contest sociâl, culturâl e economic da la citât.
La costituzion e lis voris da la Taule no varan spesis e no tocjaran in nissune maniere la ativitât da la Regjon ni dai ents regjonâi sorestants su la tutele da lis minorancis linguistichis storichis e di chê furlane in particolâr. No tocjaran nancje la iniziative autonome e libare da lis fuarcis politichis, che a podaran simpri fâ valê intes sedis justis lis lôr posizions sui problemis da la minorance linguistiche, in mût indipendent di ce che e dîs la Taule.
A fasaran part dal sodalizi 11 membris che a fevelin par furlan, nomenâts dal sindic o su indicazion dal orghin, ent o associazion che a rapresentin: doi rapresentats dal consei comunâl esperts dai problemis da lis minorancis linguistichis da la citât e, tra chescj, un proponût dai grups consiliârs di maiorance e un altri proponût dai grups consiliârs di minorance, un da l’ARLeF - Agjenzie Regionâl pe Lenghe Furlane, un da l’Aclif - Assemblee comunitât linguistiche furlane, un da la SFF - Societât Filologijche Furlane,sîs dal ambient culturâl e associatîf gurizan da la comunitât linguistiche furlane.