Puedial un dissen animât contâ une tragjedie? Isal pussibil pandi midiant di un fumet la storie di un disastri par colpe dal om? La rispueste si clame Ti conti il Vaiont, la animazion di une graphic novel realizade de Societât Filologjiche Furlane par contâ ai plui zovins ce che al è sucedût ai 9 di Otubar dal 1963, cuant che la mont Toc e je vignude jù causant une ondade di passe 250 metris che e à sdrumât i paîs di Nert, Cas, Longaron e almancul altris cinc frazions cun cuasi 2000 muarts.
Cuntun lengaç adat par fruts, zovins e grancj, i dissens dal fumetist Paolo Cossi nus menin ae scuvierte des causis e des conseguencis di chê che e je stade une des plui grandis disgraciis de seconde metât dal Nûfcent.
Par memoreâ chescj fats, za cualchi an indaûr la Filologjiche e veve inviât un progjet didatic (frache achì par jentrâ inte pagjine dal progjet) e cumò, partint propit di chel progjet, e à fat ancjemò un pas indenant cu la animazion dal fumet, che al veve vût za tant sucès come libri a stampe.
In ocasion dal sessantesim inovâl de tragjedie us proponìn la vision dal fumet animât te version in lenghe furlane. Par viodilu al baste inviâ il filmât intal barcon parsore, fracant su la freçute.
Cun di plui, a la vôs download in cheste pagjine, si pues discjamâ in formât PDF sedi il cuader sedi il fumet di Ti racconto il Vajont / Ti conti il Vaiont.
In chestis zornadis il Docuscuele, Centri regjonâl di documentazion pe scuele furlane de Filologjiche, al è daûr a promovi la proiezion dal filmât pai students des scuelis in dut il Friûl.