No si pues fevelâ di leterature furlane cence ricuardâ il premi San Simon, il plui impuartant ricognossiment pe scriture in marilenghe, nassût intal 1979 par volontât dal Comun di Codroip e intitulât ae figure dal inzegnîr Agnul Di Spere (Angelo Pittana).
Tra lis pagjinis e i Sants. Storiis e autôrs dal premi San Simon e je une trasmission radiofoniche pe Rai dal Friûl Vignesie Julie par cure de Societât Filologjiche Furlane, cu lis vôs di Serena Fogolini e Walter Tomada e cun leturis di Massimo Somaglino.
Vie pes pontadis, che a laran in onde la sabide, cun orari 13.42, i scoltadôrs a podaran cognossi cualchidun dai vincidôrs, intun percors indaûr intal timp ae scuvierte di personaçs e curiositâts platâts intes pagjinis de storie di chest premi leterari.
Daspò dai apontaments dal an passât, dedicâts a Alan Brusini, pre Antoni Beline, Franco Marchetta e Gianluca Franco, si torne a tacâ cun chest program:
Sabide ai 27 di Setembar, a la une e 42
Ovidio Colussi - Pâs e uera, Disfortunis
Sabide ai 4 di Otubar, a la une e 42
Giovanni Morsan - Zovin di lune
Sabide ai 11 di Otubar, a la une e 42
Tarcisio Mizzau - L'ultime puarte, Speriments di perfezion
Sabide ai 18 di Otubar, a la une e 42
Laurin Zuan Nardin - Il cop, Trê dîs
Dutis lis pontadis di Tra lis pagjinis e i Sants si podaran tornâ a scoltâ su Rai Play sound, dentri dal podcast Conte che ti conti.