Prin di Lui dal 1916: dongje dal cimitieri di Çurçuvint a vegnin fusilâts cuatri alpins de 109esime compagnie dal bataion " Monte Arvenis".
A son Silvio Gaetano Ortis di Paluce, Basilio Matiz di Tamau, Giovanni Battista Coradazzi di Fors Disore e Angelo Massaro di Manià. I cuatri, par no vê ubidît a un ordin sbaliât, a vegnin processâts e condanâts a muart cu la acuse di rivolte e di insubordinazion: la sentence e ven lete te glesie di Çurçuvint, mudade pe ocasion in tribunâl.
La Societât Filologjiche Furlane e à dedicât a cheste pagjine di storie cetant tragjiche il moment finâl de "Setemane de culture furlane" di chest an, cu la propueste de leture teatrâl Tra lûs e scûr (Çurçuvint) di Carlo Tolazzi pe regjie di Massimo Somaglino, cun Alessandro Maione, Filippo Quezel e Massimo Somaglino.
Tal aniversari di chei fats sucedûts dilunc de prime vuere mondiâl, us tornìn a proponi la vision dal spetacul. Par viodilu al baste fracâ su la freçute tal barcon achì parsone.