A son passâts vincjecinc agns dai 28 di Novembar dal 1998, cuant che al murì a Guriza Celso Macor, une da lis vôs plui altis dal Nûfcent tal Friûl di soreli jevât.
Par onorâ la memorie dal poete e scritôr tal inovâl da la muart, la Societât Filologjiche Furlane e il Comun di Romans dal Lusinç a inmanein a Vierse, il paîs li che Macor al jere nassût, un incuintri par fevelâ dai temis che l’inteletuâl gurizan al veve plui a cjâr: l’amôr pe mont e pe leteradure.
La serade e je organizade cu la colaborazion da la Unitât pastorâl tra lis parochiis di Sante Marie Anunziade di Romans e di Sant Andree Apuestul di Viarsa, dal Circul ricreatîf, sportîf e filodramatic di Viarsa, dal Grup culturâl di ricercje “I Scussons” e da la sezion di Gurize dal CAI, Club alpin talian, cu la poie da la Casse Rurâl dal Friûl Vignsie Julie.
A intervegnin Marko Mosetti, sul impegn di Macor pe riviste «Alpinismo Goriziano», che par tancj agns al à direzût, e Gabriele Zanello, su la atualitât dal pinsîr dal poete. Leturis di Giorgio Monte.
Macor al sarà ricuardât ancje cuntune messe sabide ai 25 di Novembar a lis 7 di sere inte glesie di S. Zorç Martar a Lucinîs.