Vinars ai 17 di Zenâr lis minorancis linguistichis dal Friûl Vignesie Julie si dan dongje a Spilimberc par fâ il pont su difese e promozion di chestis fevelis a 25 agns da la Leç 482/99.
I furlans a saran rapresentâts da la Assemblee de Comunitât Linguistiche Furlane (ACLiF), da la Societât Filologjiche Furlane, dal Istitût Ladin Furlan Pre Checo Placerean e da la ARLeF.
A saran presints la Confederazion da lis Organizazions Slovenis (SSO), l’Union Associazions Catolichis Slovenis (ZSKP) e l’Union Culturâl Economiche Slovene (SKG).
E vignarà par la prime volte l’Assemblee de Comunitât Linguistiche Todescje (ACLiT). Al sarà ospit il procuradôr da la Comunitât ladine di Fasse.
Obietîf al è rinfuarcî la sinergjie jenfri lis realtâts istituzionâls e associazionistichis che a rapresentin lis trê lenghis minoritariis, che metudis adun a son maiorance inta la nestre Regjon.
O sês ducj invidâts a partecipâ.