O sperìn di podê tornâ a vierzi dal dut il prin pussibil, ma intant us presentìn in maniere virtuâl lis nestris bielis sedis di Udin e di Guriza! Fracait sui
links in cheste pagjine par cognossilis.
A Udin la Societât Filologjiche Furlane e à sede in
Palaç Mantica, une dimore dal XVI secul, al civic 18 di vie Manin dongje de puarte omonime che e faseve part dal tierç cercli di muris di Udin. La Societât e cuistà il palaç dai ultins dissendents de nobile famee Mantica tal 1966, in gracie dal impegn dal sen. Guglielmo Pelizzo che al jere president dal Istitût. Par valorizâ il palaç e i siei tesaurs, di resint al è stât catalogât par intîr dut il patrimoni artistic.
La sede di Guriza e je
Cjasa Ascoli, al civic 1 di vie Ascoli, in principi dal ghet ebraic istituît tal 1696 cun edit dal Imperadôr Leopolt I. Pe nestre Societât e à une grande impuartance storiche, stant che culì al nassè l'innomenât glotolic gurizan Graziadio Isaia Ascoli (1829-1907), che la Filologjiche i è intitulade. Cjasa Ascoli e je deventade sede pal Friûl di soreli jevât tal 2019, an dal Centenari di fondazion dal nestri Istitût culturâl, nassût propit a Guriza ai 23 di Novembar dal 1919.