Dopo che l'an passât la Societât Filologjiche Furlane e à celebrât il so Centenari di fondazion cul Congrès a Udin, chest an si cjatisi ta comunitât di Flumisel La Vila, il teritori là ch’al nassè Ugo Pellis (1882-1943), benemerit dai studis furlans e un dai paris dal nestri Istitût.
Une prime volte che si ten culì il Congrès sociâl, un’ocasion di fieste, pe Filologjiche e par dute la Furlanie, e il prin grant event dopo ce ch’o vin passât di Fevrâr incà, a dimostrazion de volontât di superâ la pandemie e lis pôris, di no fermâsi e di cjalâ al doman cun serenitât e sperance.
Apontament duncje par
domenie ai 4 di Otubar, cun prenotazion obligatorie li de segretarie de Filologjiche e fin ch'al è puest, tal rispiet de normative in vore cuintri il Covid-19 (tel. 0432 501598 int.1,
info@filologicafriulana.it).
E vierzarà lis manifestazions,
vinars ai 2 di Otubar, la proiezion speciâl dal docufilm
L'Atlante della Memoria, pe regjie di Dorino Minigutti, che si ispire propit a Ugo Pellis e a l'imprese dal ALI - Atlant Lenghistic Talian (prenotazions li de biblioteche di Flumisel, tel. 0431 969440,
biblioteca.fiumicello@comune.fiumicellovillavicentina.ud.it).
Te dì dal Congrès e dilunc di dôs seradis a Flumisel (Sale Bison,
martars ai 6 di Otubar) e a La Vila (Sale Polifunzionâl,
martars ai 13) al vignarà ancje presentât il Numar Unic "Flumisel La Vila", par cure di Ferruccio Tassin: 550 pagjinis cun 40 contribûts scrits di passe 30 autôrs su la storie, l'ambient, la int dal teritori.