Il Fonts Costantini e je une racuelte di documents che la Clape Culturâl Acuilee i à regalât ae Societât Filologjiche Furlane. In dut te racuelte a son 798 tocs, che a corispuindin a un miâr di predicjis e di catechisims, pal plui par furlan, dai agns tra il 1779 e il 1930. Il merit di cheste racuelte cussì impuartante e interessante lu à Giovanni Battisti Costantini (1846-1903), un predi origjinari di Tresesin. Tai trente e passe agns che al è stât capelan a Solescjan, al à tirât dongje cun passion une vore di tescj che a vignivin massime di Pavie, Udin, Lumignà, Percût e Trivignan. A cheste racuelte, po, a son stadis zontadis lis predicjis e i catechisims di so nevôt Faustino Costantini (1898-1930), che al è muart une vore zovin.
Il fonts lu à inventariât Enrica Capitanio e lis predicjis lis à studiadis Gabriele Zanello.