Duilio Durigon di Magnanins di Rigulât al è stât un colezionist di volums, stampis e cjartis gjeografichis. Tal 2016 al à donade dute la sô racuelte ae Societât Filologjiche Furlane, une racuelte insiorade cun edizions pardabon preseadis e cun tancj volums di robis furlanis une vore interessants, metûts adun in tancj agns di ricercjis tai marcjâts e tes librariis di anticuariât. Il fonts al met dongje codiçs antîcs leâts in piel o pergamene, cjartis sparniçadis, oparis in plui volums e cualchi riviste, dute robe conservade cun chê plui moderne, ancje dai agns Doimil.
Te part antighe, si cjatin volums dal Cinccent e dal Sîscent e tantis edizions dal Sietcent e dal Votcent. I contignûts di chescj libris a son svariâts, in particolâr di caratar religjôs, cun titui di teologjie, storie eclesiastiche, di devozion e oratorie sacre, ancje par latin. Tantis lis oparis di leterature
classiche, di filosofie e storie, par latin e par francês. Ma ancje manuâi d'istruzion, dizionaris e oparis di interès locâl. Tes schedis dal catalic a son stadis metudis in evidence lis informazions cjatadis dentri dai volums o te leadure: notis scritis a man e firmis autografis, timbris, sigjîi, ex libris: a son testemoneancis preziosis dai passaçs di proprietât dai volums, di cui che, timp indaûr, al à comprât, let e studiât chel volum che cumò al è disponibil par jessi doprât di bande di ducj.
I titui des oparis a si puedin consultâ tal catalic in linie de Societât Filologjiche al link: https://opac.filologicafriulana.it/ricerca/semplice.