La siore Rita Cher Michelazzi e à donât ae Societât Filologjiche lis oparis componudis dal so om, Gino Michelazzi, muart tal 2014. A son uns cincuante tocs di svariâts gjenars musicâi (musiche da cjamare, sinfoniche e sacre), scrits intun stîl moderni, cuntune buine paronance des tecnichis dal componi.
Nassût a Udin tal 1928, Gino Michelazzi al à studiât armonie e cuintripont cui mestris Mario Montico e Giulio Viozzi. Dopo, al cjape il diplome in pianoforte intal Conservatori di Alessandrie. Tai ultins agns de sô vite si dediche ae composizion. Michelazzi al ve il bon acet di bande dal public e de critiche in cetancj concierts a Varsavie, Rome, Milan, Oderzo e in diviers paîs atôr pal Friûl. Il repertori di Michelazzi al à dentri tocs sinfonic-corâi, ancje cun tescj in lenghe furlane, musiche contemporanie e musiche sacre pes liturgjiis.
Dut il materiâl al è stât metût in Biblioteche e al è stât catalogât, restant a disposizion di studiôs e apassionâts di musiche (i titui si puedin consultâ tal catalic in linee de Societât Filologjiche ae direzion
www.filologicafriulana.it/opac).