Tal 2019 la Societât Filologjiche Furlane, nassude a Gurize ai 23 di Novembar dal 1919, e à memoreât il Centenari di fondazion cuntune largje schirie di events, in regjon e fûr de regjon, che e à permetût di cognossi miôr lis cundizions che a àn puartât ae nassite dal sodalizi e i siei protagoniscj dilunc di un secul di storie.
L'impegn dai nestris Paris al è stât dal sigûr grivi ma decisîf, se o pensìn al contribût fondamentâl che la Societât e à dât pal progrès dai studis furlans, in plui setôrs, e par mantignî la identitât de nestre tiere e dâ vôs ae nestre int.
In cheste ocasion al è stât realizât il video Furlanie, un piçul viaç jenfri temis e personaçs di îr e di vuê, espression di un secul di storie.
Lis musichis a son stadis componudis e direzudis dal mestri Valter Sivilotti, su la fonde dal Salût 'e Furlanie di Arturo Zardini, miôr cognossût tant che Cjant de Filologjiche. Esecuzion di bande de Orchestre Zovanîl dai Filarmonics Furlans, cu la partecipazion dal violin solist Lucio Degani.
La regjie e je di Dorino Minigutti.
Buine vision!