La Societât Filologjiche Furlane, nassude a Guriza tal 1919, par onorâ la sô citât di fondazion e à metût sù tai gnûfs spazis di Cjasa Ascoli une mostre dedicade al glotolic gurizan Graziadio Isaia Ascoli e a lis lenghis di Guriza.
Une mostre permanente, che e presente no dome la vite e la opere sientifiche dal pari dai studis di glotologjie e di lenghistiche comparade in Italie, ma ancje la situazion etnolenghistiche dal Gurizan, la sole aree in dute Europe li che tal cors de storie - fin a la conclusion de prime vuere mondiâl - a àn vivût insiemit lis comunitâts taliane, slovene, furlane, todescje e ebraiche.
I temis tratâts inte mostre a son:
• “Villa quae lingua sclavorum vocatur Goriza”
• Guriza Asburgjiche
• Il Nûfcent
• Lis comunitâts lenghistichis di Guriza
• Il talian
• Il “sonziac” e i autôrs furlans
• Il sloven
• Il todesc
• L’ebraic
• Lis lenghis de Glesie
• Graziadio Isaia Ascoli
• Ugo Pellis
La mostre, rincurade di Ivan Portelli, Maria Chiara Visintin e Gabriele Zanello, e je adate in maniere particolâr a lis scuelis e si pues visitâle intai oraris pal public de sede gurizane o par apontament.
I catalics de mostre (par talian, furlan, todesc, inglês e sloven) si puedin discjamâ fracant culì: www.filologicafriulana.it/consulta-i-cataloghi/