Normative

Il ricognossiment juridic de lenghe furlane al è stât otignût che nol è trop.
 
La Costituzion taliane, fin di cuant che e je stade promulgade, il prin di Zenâr dal 1948, e previôt che a àn di esisti normis par tutelâ lis lenghis regjonâls e minoritariis che si fevelin storicamentri tal teritori dal stât  (l’art. 6, di fat, al dîs che “La Republiche e tutele cun normis di pueste lis minorancis lenghistichis”).
 
Lis primis azions concretis di promozion e di sosten in chest setôr, però, a son stadis puartadis indenant de Comunitât Europeane, che ai 5 di Novembar dal 1992 e à fat buine la Cjarte europeane des lenghis regjonâls o minoritariis, un document che al è za stât ratificât de plui part dai stâts membris de Comunitât.

Par che la costituzion taliane e vignìs metude in vore, si à vût di spietâ il 1999, cuant che e je stade fate buine la leç cuadri su lis minorancis lenghistichis, la nr. 482 dai 15 di Dicembar dal 1999, "Normis in materie di tutele des minorancis lenghistichis storichis".

A nivel di normative regjonâl, il Friûl Vignesie Julie al jere za intervignût cualchi an prin cu la leç regjonâl di tutele, la nr. 15 dai 22 di Març dal 1996, “Normis pe tutele e la promozion de lenghe e de culture furlane e istituzion dal servizi pes lenghis regjonâls e minoritariis”.
Cualchi an plui tart e je stade fate buine une seconde leç regjonâl sul furlan, la nr. 29 dai 18 di Dicembar dal 2007 “Normis pe tutele, la valorizazion e la promozion de lenghe furlane”.