Riviste Scuele Furlane

Lis ativitâts pe scuele furlane a son simpri stadis une part impuartant dai programis de Societât Filologjiche Furlane: dai cors di formazion di pre Bepo Marchet ai struments didatics che e à publicât di cuant che e je stade fondade.
Par chest, il sfuei di informazion Scuele furlane al vûl jessi un imprest gnûf che al met in evidence chest rapuart de  Filologjiche cu lis scuelis, cui dirigjents e cui mestris, ma soredut cui arlêfs e cui gjenitôrs. 
Chest boletin al rapresente un moment di riflession e di confront cui operadôrs dal mont de scuele. Al vûl jessi ancje une vitrine dai progjets didatics plui inovatîfs e interessants, ma ur da ancje vôs ai problemis e aes cuistions viertis.
Chest al è un mût par dî che la scuele in marilenghe e je une sielte di rispiet de nestre identitât e une sielte di prospetive. Imparâ il furlan al è un segnâl che si fâs part di une storie e di une culture che, cui nestris zovins, e pues vê un grant avignî.

Ogni numar al propon une riflession sul status dal insegnament dal furlan sul nestri teritori e al conte une esperience didatiche che e je stade puartade indenant par insegnâ la marilenghe. Cun di plui, a son segnalazions bibliografichis utilis par insegnants e students, di mût che lis ideis e lis esperiencis a puedin jessi condividudis.
L’invît par ducj al è chel di colaborâ al boletin mandant propuestis, lavôrs e osservazions, di mût che i contignûts a puedin jessi simpri inzornâts.