Ae fin dai agns Sessante dal Nûfcent, la Societât Filologjiche Furlane e invià un progjet sistematic par tirâ dongje narative di tradizion orâl e realizâ une schirie di tescj che a son jentrâts te golaine dai “Racconti popolari friulani”.
La golaine e je incressude massime tai prins dîs agns. Luigi e Andreina Ciceri a cjatarin daurman la colaborazion di Renato e Elvia Appi e tra di lôr si dividerin il lavôr: Andreina Nicoloso Ciceri e stave daûr ae provincie di Udin (volums sul Friûl culinâr, Buie e Are di Tresesin e in Cjargne chel su Çurçuvint); i Appi, on e femine, a lavorarin pal Friûl di soreli a mont. In provincie di Pordenon si interessarin in prime persone dai rilevaments a Cordenons e te zone di Concuardie. Po dopo si zontarin altris coalboradôrs tant che Umberto Sanson, Adriana Cesselli e Dani Pagnucco, rivant cussì a cuvierzi une aree biele largje jenfri la Ciline e la Livence.
In agns resints, pes zonis di Budoie, Culture, Mezamont e Polcenic a son vignudis fûr gnovis edizions, inricjidis cun tescj gnûfs tirâts dongje di Nicoletta Bosser, Alessandro Fadelli e Vittorina Carlon.
A completin la golaine lis inchiestis inte zone di Denemonç e Preon, rincuradis di Enza Sina e il ‘Repertori de narative di tradizion orâl in Cjargne’ di Letizia Cimitan, opare fondamentâl di classificazion dai tescj daûr dal indiç internazionâl Aarne-Thompson.
Inte golaine a cjatin puest ancje lis racueltis ‘storichis’ di narative popolâr tant che “Sot la Nape” di Dolfo Zorzut, za publicade tal 1924-1926, e lis “Lejendis tal lunari” di Giuseppe Ferdinando del Torre, dongje dal recupar e de edizion critiche di documentazion manuscrite. Andreina Ciceri e à rincurât la publicazion dai tescj trascrits, jenfri la fin dal Votcent e il principi dal Nûfcent, di Giovanni Tavoschi a Liariis, biel che Domenico Isabella al à seguît la edizion dal manuscrit dal marangon Fulgenzio Schneider (1864-1941) di Sauris. L’ultin volum de golaine al cjape dentri lis contis che ’Sef mulinâr di Nimis (Giuseppe Piccini) al contave par radio tai agns dopo dal taramot dal 1976.
Chest corpus di narative popolâr al rapresente cence dubi un patrimoni unic di liendis, flabis, nainis, contis sacris e profanis, racueltis e trascritis intes varietâts lenghistichis locâls, un patrimoni che al devente simpri plui preziôs man a man che a vegnin mancul lis “fonts” di chescj tescj, ven a stâi i informadôrs.
Par la cuâl si capìs la impuartance de racuelte e de edizion di chescj materiâi, la sole maniere par conservâ la storie e la memorie coletive dal nestri popul, une memorie tant siore e vivarose.
Il dissen in cheste pagjine al è di Federica Pagnucco.