La Societât Filologjiche Furlane e promôf e e vuide il progjet Riviste Friulane, un catalic che, in gracie de adesion di bande dai principâi istitûts culturâi dal Friûl, al met a disposizion di dute la comunitât saçs e contribûts che si riferissin a teritori, storie, ambient, art, lenghe e culture furlane.
Chestis a son lis rivistis presintis a vuê tal catalic:
- Ce fastu?
- Sot la Nape
- Memorie Storiche Forogiuliesi
- Atti dell’Accademia San Marco di Pordenone
- Atti dell'Accademia Udinese di Scienze Lettere ed Arti
- La Panarie
O fevelìn di plui di 23.000 contribûts publicâts dal principi dal Nûfcent fin in dì di vuê.
Par dutis lis rivistis al è stât fat il spoi, cu la descrizion bibliografiche dai singui articui par dutis lis anadis. Ducj i articui dai periodics a son stâts digjitalizâts e i file otignûts, in formât PDF, a son duncje colegâts ae schede bibliografiche di riferiment. Cuant che si cjate l’articul che al interesse, duncje, si pues consultâlu daurman in rêt.
La ricercje e je vierte a ducj, e ducj a puedin discjamâ i pdf disponibii, fûr che chei dai articui publicâts tai ultins trê agns.
Il servizi al è sore nuie.
Sul catalic si puedin fâ chestis ricercjis:
• Ricercje semplice: lis peraulis inseridis inte casele a vegnin cirudis tal stes timp su ducj i cjamps dal catalic
• Ricercje avanzade: e ven fate in maniere specifiche suntun, o plui, dai cjamps jemplâts.
Une volte che si à cjatât l’articul che al interesse, al baste fracâ sul file PDF dal cjamp “Allegati”: si podarà cussì lei l’articul e discjamâlu.
Cuant che si cjate l’articul che si cîr, al baste clicâ sul file PDF tal cjamp “In zonte” e si vierç cussì l'articul o lu si discjame sul computer.
Il progjet al reste dut câs viert e, par un doman, si intint incressi il numar dai partner e des rivistis di fâ jentrâ intal catalic.