Doi puescj in Filologjiche pal servizi civîl nazionâl
Lis domandis a àn di rivâ dentri dai 27 di Lui dal 2009
L’Ufici Nazionâl pal Servizi Civîl al à dât fûr l’avîs pe selezion di 179 volontaris di inviâ vie pal an 2009 tai progjets di servizi civîl te Regjon Friûl Vignesie Julie. Dentri de graduatorie fate buine de Regjon, al è ancje il progjet La Biblioteca dei friulani – La Biblioteche dai furlans, promovût de Societât Filologjiche Furlane, che e met a disposizion 2 puescj.
L’obietîf dal progjet al è chel di formâ i zovins che a saran selezionâts par slargjâ, tal stes timp, i servizis al public de Biblioteche de Societât, in maniere di podê disponi di operadôrs cualificâts in grât di indreçâ l’utent tal so percors di ricercje bibliografiche. I volontaris si ocuparan di front office e back office di biblioteche, segretarie di redazion di rassegnis bibliografichis, catalogazion digjitâl dal patrimoni bibliografic.
Il servizi, che al tacarà cun Dicembar dal 2009, al durarà dodis mês e ai volontaris i spietarà un assegn di 433,80 euros al mês. A puedin partecipâ ae selezion i citadins talians, cence distinzion di ses che, te date di presentazion de domande, a vedin disevot agns finîts e no plui di vincjevot. In particolâr, par partecipâ ae selezion in Filologjiche, si domandin la lauree trienâl (a saran titui preferenziâi il percors di studi archivistic-librari o ben vê superâts esams di aree biblioteconomiche), la cognossince certificade de informatiche di base, la cognossince certificade de lenghe inglese (nivel medi), buinis capacitâts di comunicazion. La sede dal servizi e sarà la Biblioteche de Societât Filologjiche Furlane in vie Manin 18 a Udin.
La domande di partecipazion ae selezion, compagnade de fotocopie di un document di identitât valit e di une schede che e cjapi dentri i titui, e varà di jessi spedide o presentade diretementri ae Societât Filologjiche Furlane vie Manin, 18 – 33100 Udin dentri des 14.00 dai 27 di Lui dal 2009.
Avîs Servizi Civîl 2009 - Regjon FVG Schede dal progjet La Biblioteche dai furlans
Par altris informazions e pal discjamâ il model de domande, viôt i sîts www.fvgsolidale.regione.fvg.it e www.serviziocivile.it.
Societât Filologjiche Furlane "Graziadio Isaia Ascoli"
Vie Manin, 18 - 33100 Udin
tel. 0432 501598, fax 0432 511766
info@filologicafriulana.it