2nt BANT DI CONCORS - Associazion “PERCOTO CANTA"

La Associazion culturâl musicâl “PERCOTO CANTA”, cul patrocini de Regjon Friûl Vignesie Julie, de Provincie di Udin, dal Comun di Pavie di Udin, e cul patrocini e cu la colaborazion de Societât Filologjiche Furlane, e bandìs un concors pe realizazion di un elaborât par furlan (conte, poesie, teme, flabe, rimarole, ricercje, e vie indenant) su chest teme:

IL DISVILUP TECNOLOGJIC

Dal vieli al gnûf, de tradizion a la inovazion: mil e plui struments che a judin la vite dal om… Ma la gnove tecnologjie produsie machinis al servizi dal om o pûr fasie deventâ l’om un strument des machinis?

Articui dal bant: 

1. A puedin partecipâ al bant ducj i arlêfs, sedi par lôr cont sedi in grup, che a son daûr a frecuentâ l'an scolastic 2005/2006 tes scuelis Secondariis di 1n Grât de Regjon Friûl Vignesie Julie. Par partecipâ bisugne mandâ une preiscrizion (che dut câs no oblee a presentâ i elaborâts) dentri di Martars 31 di Zenâr dal 2006. La domande e va butade jù daûr dal model in alegât al bant, che si cjatilu ancje li de Segretarie de Associazion PERCOTO CANTA e sul sît internet www.percotocanta.it La organizazion e domande la preiscrizion par podê capî trops che a puedin jessi i partecipants e duncje par podê preparâsi a valutâ miôr che e po ducj i elaborâts. 
2. I elaborâts a àn di rivâ in dople copie (une su cjarte e une su floppy disk) mediant di letare racomandade a cheste direzion: Associazione Culturale Musicale “PERCOTO CANTA” via Gorizia n° 17 PERCOTO 33050 Pavia di Udine, o pûr par pueste eletroniche a cheste direzion: info@percotocanta.it dentri di Vinars 31 di Març dal 2006; al fasarà fede il timbri des puestis o la date dal messaç di pueste eletroniche. Ogni partecipant al varà di specificâ non, cognon, direzion, telefon, il non de sô scuele, la indicazion de sô classe e il non, il cognon e il telefon dal insegnant responsabil dal progjet. 
3. La Associazion “PERCOTO CANTA” e la Societât Filologjiche Furlane e nomenaran une jurie di personalitâts de culture furlane che e valutarà i elaborâts. Il judizi de jurie al è insindacabil. I nons dai membris de jurie a saran disponibii sul sît internet www.percotocanta.it cun Sabide 8 di Avrîl dal 2006. 
4. La comission e sielzarà i trê miôr elaborâts e e premiarà il miôr elaborât cun: 1 letôr MP3 e 3 libris ufierts de Societât Filologjiche Furlane. Il secont classificât al ricevarà chescj premis: 1 letôr CD e 2 libris ufierts de Societât Filologjiche Furlane. Il tierç classificât al ricevarà: 1 credit telefonic di € 25 (cun cualsisedi gjestôr) e 1 libri ufiert de Societât Filologjiche Furlane. 
5. Ducj i elaborâts in concors a saran in esposizion al public vie pal mês di Lui te suaze di une mostre metude sù di pueste te Vile Caiselli di Percût intant dal “Festival dello Sport” e de 19e edizion de manifestazion di cjant “Percoto Canta”; in cheste ocasion i vincidôrs a ricevaran i premis. Ducj i elaborâts, o une part, a vignaran publicâts tun volum di pueste par cure de Societât Filologjiche Furlane e de Associazion PERCOTO CANTA. I autôrs dai elaborâts premiâts si impegnaran a sigurâ la lôr presince, o a mandâ un lôr rapresentant a la premiazion. 
6. Cui che al partecipe al concors al è obleât a rispietâ i articui dal bant. La Associazion culturâl musicâl “PERCOTO CANTA” si ten in bon di gambiâ alc tal regolament cence tocjânt i concets di fonde.

Chest bant lu cjatais ancje sul sît internet www.percotocanta.it I dâts personâi dai partecipants a vignaran doprâts dome pai fins dal concors (informative ex art. 13 dal D.Lgs. 30/06/2003 n 196 sul Codice della Privacy). Il titolâr dal tratament al è il President de Associazion culturâl musicâl “PERCOTO CANTA”. Il President si vâl ancje de colaborazion di conseîrs e di socis de associazion. Si pues domandâ informazions al Siôr. Lestuzzi Nevio al N 348/2260818 di dopodimisdì.