La Societât Filologjiche Furlane
e presente
Il mont des ruedis
il cuart dvd dai Omenuts
Joibe ai 18 di Dicembar dal 2008, aes vot di sere li dal cine Visionario a Udin
inte suaze de serade di premiazion dal Concors par tescj cinematografics in lenghe furlane promovût dal CEC - 7e edizion
Omenuts al è il prin disen animât in lenghe furlane dât fûr in DVD, voltât dal inglês Little People de Mattel–Fisher Price, une vore cognossût in dut il mont ma che nol à mai vude une version par talian. Al è par chest che si trate di une prime assolude no dome pal public furlan, ma ancje par chel talian.
La serie dai Omenuts e conte lis aventuris dai piçui protagoniscj Lole, Miute, Pieri, Bete e Tonin, cinc fruts che, cu la lôr abilitât e la lôr voie di discuvierte a frontin di volte in volte gnovis aventuris, intun mont fat su misure pai frutins.
I episodis di Omenuts - a 'nd è cinc par ogni dvd - a durin cinc minût dal un, un timp che si adate ae capacitât di atenzion dai plui piçui. Par cumò a son disponibii i volums 1, 2 , 3 (Ogni dì une Maravee, Maraveis di Nadâl, Il mont des bestiis) e il gnûf volum numar cuatri Il mont des ruedis.
La edizion in lenghe furlane cu lis vôs dopleadis e mixadis e je par cure de Raja Films di Udin; la Arte Video di Palme e à curât la grafiche, l’authoring e mastering dal DVD.
I DVD si cjatin a vendi li de sede centrâl de Societât Filologjiche Furlane in vie Manin 18 a Udin, li des sedis di Gurize e Pordenon, e intes librariis dal Friûl.
Par informazions:
Societât Filologjiche Furlane - Ufici Progjets e Events
Vie Manin, 18
33100 Udin
tel. 0432 501598
fax 0432 511766
info@filologicafriulana.it