Ativitât

AVÎS DI CONCORS “CONTIS E PUISIIS DI INT E DI PAÎS” - PREMI MENI UCEL

Biliris, Magnan in Riviere, jenfri dai 31 di Otubar dal 2005
  1. La Associazion “Pro Biliris”, cu la colaborazion de Societât Filologjiche Furlane e cul patrocini de Provincie di Udin, dal Comun di Magnan in Riviere, de Fondazion C.R.U.P. di Udin, e inmanee il secont concors leterari in lenghe furlane pe assegnazion dal “Premi MENI UCEL” cul titul di “Contis e puisiis di Int e di Paîs”.
  2. Il concors si spartìs in dôs sezions: * la sezion dai fantacins, dome pai arlêfs des scuelis primariis e secondariis, * la sezion dai grancj, dome pai residents in Italie o tal forest. 
  3. Lis voris, dal gjenar naratîf o poetic, a scugnaran tratâ e tignî cont dai aspiets, int, ambients de realtât sociâl e culturâl furlane e de vite di ogni dì, cuntun snait satiric o umoristic. 
  4. Lis voris dai partecipants a scugnaran vignî mandadis in origjinâl, mai publicadis e scritis par furlan; no varan di vê plui di cuatri cartelis cu la interlinie ugnule par sessante batudis, pene la esclusion, ven astâi che chês plui lungjis a saran scartadis.Al sarà une vore preseât il fat di podê ricevi i scrits za regjistrâts suntun floppy disk o ben suntun CD. 
  5. I tescj presentâts a saran scrutinâts e po judicâts di une Jurie di siet di lôr, sielts tra lis personalitâts de culture furlane o su propueste dai Ents che a sustignin il concors. 
  6. Cuintri lis decisions de jurìe no si po ricori. 
  7. In tal câs che nissune vore di nissune des dôs sezions e fos judicade meretorie dal premi, chest nol sarà dât a dinissun, o, salacor, al po vignî spartît in parts compagnis tra lis oparis miôr. 
  8. Daûr de propueste mutivade de jurìe, la Associazion “Pro Biliris” e podarà decidi di publicâ lis contis e lis puisiis premiadis o segnaladis, ancje cuntun adatament ae grafie uficiâl sal coventas. In chest câs i dirits di autôr e di publicazion de prime edizion des voris stessis a restaran di proprietât de Associazion “Pro Biliris”. 
  9. Dutis lis voris, ancje chês che no vegnaran ni premiadis, ni segnaladis, no saran mai tornadis. 
  10. Lis voris a varan di rivâ di chi al 31 di otubar dal 2005 e no dopo, a cheste direzion: Associazion Pro Biliris - Concors leterari 33010 MAGNAN IN RIVIERE (UDIN) 
  11. Lis voris a varan di rivâ mitudis intun plîc cun dôs bustis sieradis dulà che si à di scrivi parsore il titul de conte o de puisie e la sezion sielte e che no varan di vê par nuie il non dal autôr. Intune buste si varà di meti dentri il componiment (e ancje il floppy disk o il CD), chê altre e varà di vê invezit un sfuei dulà che al sarà scrit: Sezion pai grancj: Sezion pai fantacins: Il titul de conte o de puisie Il titul de conte o de puisie Il non, cognon, direzion Il non, cognon, etât, direzion e numars di telefon dal autôr. e numars di telefono dal autôr. Scuele e classe che e partecipe. Direzion e numars di telefon de scuele che e partecipe. Non e cognon dai docents responsabii dal progjet. 
  12. Tra dutis lis oparis presentadis, la juris e darà: - pe sezion grancj: un prin premi di € 600,00, e un secont premi di € 300,00. - pe sezion fantacins: un prin premi in libris par uns € 300,00 e un secont premi simpri in libris par un valôr di € 150,00. La premiazion dai partecipants e sarà fate ai 17 di dicembar dal 2005, aes 5,00 sore sere, inte Sale Sociâl di Biliris, borc Sant Jacun, numar 4 – Magnan in Riviere (Udin). 
  13. Ducj chei che a partecipin al concors a scugnin acetâ ad implen e fâ bon dut ce che al dispon chest bant.
Links

Iscriviti ae Newsletter

Ti informarìn sui events. Tu ricevarâs lis gnovis de Societât Filologjiche Furlane. Tu podarâs prenotâ lis nestris publicazions.
Iscriviti