ASSOCIAZION “GLI STELLINIANI”

dal LICEU CLASSIC STATÂL “J.STELLINI”

UDIN

Zardin Grant n.26

Tel.0432 504577

Progjet “Traduzion leterarie da lis lenghis classichis in furlan”

AVÎS DI CONCORS PAR TRADUZIONS DAL GRÊC E DAL LATIN IN FURLAN

L’Associazion “Gli Stelliniani”, in colaborazion cul Liceu Classic “J.Stellini” di Udin e la Societât Filologjiche Furlane, e inmanee un concors di traduzion dal grêc e dal latin in furlan.

Il compit al è chel di voltâ in furlan un test, presentât inte lenghe origjinâl greche opûr latine. Il concors al è viert a ducj i arlêfs dai liceus dal Friûl.

Par la traduzion dal grêc si varan dôs categoriis di concors: la prime dediade ai arlêfs dal Gjimnasi, la seconde dediade ai arlêfs dal Liceu; par dutis e dôs lis categoriis si propon un diviers test di voltâ. Par la traduzion dal latin si varan parimentri dôs categoriis di concors: une dediade ai arlêfs dai prims doi agns e une seconde dediade ai arlêfs dai ultims trê agns; par dutis e dôs lis categoriis si propon un diviers test di voltâ.

La partecipazion al concors e je personâl e e podarà rivuardâ sedi la traduzion dal grêc, sedi chê dal latin (a pat che e sedi rispietade la categorie di apartignince, vâl a dî chê dal gjimnasi-prims doi agns o dal liceu-ultims trê agns).

Par lis traduzions si varà di doprâ la grafie uficiâl de lenghe furlane, ma, parie cun la koinè uficiâl furlane, si podaran doprâ ancje lis varietâts locâls dal furlan, a pat che a sedin declaradis tal sfuei li che si presentarà la traduzion

 Si à di visâsi che, tai criteris di valutazion des traduzions, si tignarà cont che i arlêfs partecipants a monstrin di vê voltât in marilenghe partint dal test grêc e/o latin, e non di une traduzion taliane dal mediesim.

I lavôrs a varan di jessi mandâts al Liceu Classic “J.Stellini” Concorso Traduzione dal Latino e dal Greco in Friulano, piazza I Maggio 26, 33100 Udine.

I lavôrs a varan di jessi presentâts in forme anonime e mitûts dentri intune buste segnalade cuntun sproc, che al varà di jessi ripetût ancje intune buste sierade, che e vedi dentri il non da l’autôr, il so indiriç e la scuele frecuentade. La ultime dì par presentâ i elaborâts e je chê dal 30 di avrîl dal 2006.

La Comission Esaminadorie, fate di trê docents dal Liceu “J.Stellini” e di doi esperts di lenghe furlane nomenâts de Societât Filologjiche Furlane, a proclamarà i vincidôrs cun judizi insindacabil.

Al vignarà proclamât un vincidôr par ogni categorie; cun di plui, la Comission e pues ancje segnalâ fin a doi lavôrs par ogni categorie. I vincidôrs e i segnalâts a varan libris par premi.

A ducj i partecipants al Concors la Societât Filologjiche Furlane e darà la tessare di socio par un an.

I miôr tescj a podaran jessi publicâts su pes rivistis de Societât Filologjiche Furlane. La premiazion si fasarà probabilmentri in ocasion de “Frae de Vierte 2006”, a Pavie di Udin (UD); dut câs, la date e il lûc de premiazion a saran stabilîts definitivamentri cuntune comunicazion a vignî, insiemit cun la proclamazion dai vincidôrs e dai segnalâts.

Li des sedis de Societât Filologjiche Furlane di Pordenon, Udin, Gurize e Tumieç a son a disposizion manuâi di grafie uficiâl de lenghe furlane.

I tescj di voltâ si ju cjate li des segretariis des scuelis o li de sede di Udin de Societât Filologjiche Furlane, in vie Manin n.18.

 Udin, zenâr dal 2006.