Bon Nadâl cu la Filologjiche

Gnovis publicazions:

• Arte in Friuli, par cure di Paolo Pastres.
  Al rive il tierç e ultin volum, Dall'Ottocento al Novecento, dal grant progjet editoriâl de Filologjiche su la storie des espressions de art in Friûl, gnûf pont di riferiment intal cuadri de culture di chenti par cognossi e capî il valôr di un patrimoni che al è la fonde de nestre civiltât furlane.  

   

• Tresesin - Ad Tricensimum, metût adun di Enos Costantini

  Presentât a Otubar pal Congrès 2011, al puarte indevant la tradizion dai Numars Unics. Enos Costantini al à metudis adun 911 pagjinis di contribûts su la storie, l'ambient, la culture e l'art, la leteradure e i documents, cence dismenteâ i personaçs che a àn dât lustri a cheste biele citât dal Friûl. Une sezion, in particolâr, e je dute destinade al ricuart di Luigi e Andreina Ciceri, svant di Tresesin e benemerits de Filologjiche.

   

• Sclesis di culture materiâl. Aspetti del lavoro e della vita tradizionale in Friuli, di Lucio Peressi

  Un grant lavôr che il mestri Peressi al à puartât indenant tai agns e che cumò al viôt la lûs dentri di un sôl volum, sot forme di schedis, a testemoneance di chel lessic dut furlan leât ae vite contadine. un libri di podê doprâ ancje in clâf didatiche, pa ricuardâ, o imparâ, i nons di tancj imprescj antîcs e des ativitâts che si fasevin tai cjamps e in cjase e che a vuê o stin aromai perdint.

   

• Dino Virgili... Chel frut dai cuêi, par cure di Giannino Angeli cun ricuarts di Alberto Picotti

  Antologjie di "Dino dai  Bas", nassût a Sarsêt di Martignà tal 1925 e lât indevant tal 1983. Tal 1949, insieme cun Novella Aurora Cantaruttti e Lelo Cjanton, Virgili al veve fondât il grop leterari di  “Risultive”. Mestri tes scuelis elementârs e autôr di tancj biei tescj par furlan, i plaseve provâ gjenars leteraris e tecnichis narativis diferentis, che cheste antologjie e passe in rassegne par intîr. Al è considerât l’autôr dal prin romanç par furlan (L’aghe dapît la cleve) e ricuardât massime pal so famôs librut di leturis pai fruts, La bielestele, vignût fûr tal 1971.
  

  Strolic furlan pal 2012, par cure di Gloria Angeli.
  La strolegante de Filologjiche e je pronte a compagnâ i letôrs dilunc di dut il 2012. Cence distacâsi masse de tradizion, la gnove edizion dal Strolic furlan e presente mês par mês contis, poesiutis e lis barzaletis di Sdrindule, ma cuntun voli di rivuart pal sociâl, presentant i campions furlans mancul cognossûts, che a fasin sport di alt nivel tal mont des personis diviersementri abilis.

E pai plui piçui: 

Mariute e la cheche, test e disens di Miriam Pupini
Aventuris man par man cuntune legre mariutine, di lei tes lenghis de nestre regjon - talian, furlan e sloven - par imparâ il valôr dai bêçs e dal sparagn. Al è il prin librut dal progjet plurilengâl de Bancje di Cividât, publicât in colaborazion cu la Filologjiche.  
Anìn anìn a nolis, par cure di Andrea Venturini
Nainis, filastrocjis e rimis de tradizion orâl furlane, cjants de infanzie e cjants pe infanzie che i fruts une volte a dopravin intant che a zuiavin, ma che a dopravin ancje i grancj par passâ il timp cui plui piçui. Realizât in colaborazion cun Usci Fvg, il librut al è compagnât di un cd e des partiduris musicâls, un jutori pai gjenitôrs e pai mestris des scuelis de infanzie e dai prins agns des primariis.  
 
Un doi trê, a cura di Lia Bront
Un libri animât, plen di filastrocjis in cuatri lenghis (ancje il todesc e il sloven dongje dal talian e dal furlan) e tantis ativitâts pai fruts plui piçui di podê fâ cu la cjarte, lis fuarfis e i colôrs. 

 

O podês cjatânus a Palaç Mantica, in vie Manin 18 a Udin, tai nestris sîts di Gurize, Pordenon e Tumieç e tes miôr librariis.

Us invidìn a visitâ il book shop sul nestri sît internet www.filologicafriulana.it

La Societât Filologjiche Furlane e presente ai socis e ai amîs i miôr auguris di Bon Nadâl e Bon principi dal 2012

Par informazions:
Societât Filologjiche Furlane "G. I. Ascoli"
Vie Manin, 18  - 33100 Udin
tel. 0432 501598
fax 0432 511766
info@filologicafriulana.it - www.filologicafriulana.it