Bon Nadâl cu la Filologjiche

Lis nestris novitâts

Pai plui piçui:

Omenuts, volum numar 4.
Un gnûf volum al insiore la serie in dvd dal disen animât par furlan plui cognossût e preseât dai fruts e domandât dai mestris e des scuelis. Cheste volte i nestris piçui amîs Bete, Lole, Miute, Pieri e Tonin nus fasaran discuvierzi Il mont des ruedis. Pensât di pueste pai fruts des scuelis de infanzie e dal prin cicli de scuele primarie, al è il mût plui sclet e ninin par imparâ lis primis peraulis in marilenghe.
 
San Nicolau e il Krampus Piçul, test di Giovanna Zordan e disens di Barbara Jelenkovich.
Inte gnot dai 5 di Dicembar, cuant che il soreli al va a platâsi daûr des monts, a vegnin fûr dai boscs de Val Cjanâl i Krampus, i diaui magjics che dome San Nicolau, cul so podê, al rive a tignî cuiets. Di chest rituâl antigon e cjape pît une storie tenare scrite in cuatri lenghis (talian, todesc, sloven e furlan) e plene di biei disens, che e fâs vignî iniment dut l'incjant dal Nadâl e dal mont de infanzie.

Storie de art, de fotografie e de musiche:

Arte in Friuli, par cure di Paolo Pastres.
Al tache Dal Quattrocento al Settecento, forsit il moment di plui grant significât, un progjet editoriâl in trê volums su la storie des espressions de art in Friûl, un gnûf pont di riferiment intal cuadri de culture di chenti par cognossi e capî il valôr di un patrimoni che al è la fonde de nestre civiltât furlane.  
 
Ugo Pellis. Un fotografo in movimento, par cure di Stefano Perulli.
Il Font Fotografic Ugo Pellis de Societât Filologjiche Furlane al è un vêr tesaur di plui di 7 mil negatîfs che nus mostrin une Italie diferente, che il grant studiôs al à zirade intai agns dal 1926 al 1942. Cumò ducj, no dome i studiôs, a puedin cognossi chest tesaur, a mieç dal sît internet de Filologjiche e di chest catalic di fotografiis, une opare di grant valôr.

• Il canto popolare ladino nell'inchiesta "Das Volkslied in Österreich" (1904-1915), par cure di Roberto Starec in colaborazion cun Chiara Grillo.
  Di ducj i documents cjapâts sù tai prins dal Nûfcent intes zonis ladinis dal Tirol e dal Gurizan sot la direzion dal glotolic Theodor Gartner, la part furlane e je la plui siore: 2200 tescj cun 317 trascrizion de musiche cjapadis dentri in cheste racuelte, un patrimoni di massime impuartance inte suaze de musiche popolâr furlane. 
  

La Societât Filologjcihe Furlane e augure di cûr a ducj i siei socis e amîs Bon Nadâl e Bon Principi dal 2009

Par informazions:
Societât Filologjiche Furlane "G. I. Ascoli"
Vie Manin, 18    
33100 Udin
tel. 0432 501598
fax 0432 511766
info@filologicafriulana.it - www.filologicafriulana.it