Bon Nadâl cu la Filologjiche
Gnovis publicazions:
- Arte in Friuli, par cure di Paolo Pastres.
Al rive il tierç e ultin volum, Dall'Ottocento al Novecento, dal grant progjet editoriâl de Filologjiche su la storie des espressions de art in Friûl, gnûf pont di riferiment intal cuadri de culture di chenti par cognossi e capî il valôr di un patrimoni che al è la fonde de nestre civiltât furlane.
- A contavant...Diec', di Novella Cantarutti.
Novella Cantarutti nus à lassâts, tal 2009, che e veve bielzà imbastît il progjet di ristampe dai siei contribûts dedicâts al patrimoni orâl di Dieç, il paîs su lis mont de Cjargne che jê e preseave in maniere particolâr. La Filologjiche e à volût rispietâ il so volê e e à publicât intun volum ugnul chescj scrits metûts dongje de scritore di Navarons tai agns Cincuante e Sessante.
Chest romanç, che al è il tierç par furlan di Carlo Sgorlon, al fevele di une tematiche moderne. O sin ai timps dal shah Reza Palawi e Fatime, une fantate curde di religjon cristiane, no à plui cun ce vivi e devente la amante di doi inzegnîrs che a lavorin tal puart di Abadan. Une storie che e conte de solitudin cence fin dal om, pierdût intun univiers sterminât.
Ogni an, pal Congrès dai socis, la Societât Filologjiche Furlane e met adun une impuartante monografie sul lûc che al da acet ae manifestazion. I doi volums di San Vît, 960 pagjinis a colôrs, a cjapin dentri 52 contribûts sientifics e culturâi, di plui di 60 autôrs che a àn metût a disposizion la lôr competence e il lôr savê par realizâ une opare di culture locâl, cjapant pît dai ultins studis sul teritori di San Vît dal Tiliment.
La toponomastiche, ven a stâi la sience dai nons di lûc, e je une materie cetant interessante che e domande tal stes timp l'aprofondiment di cognossincis no dome linguistichis, ma ancje in tancj altris cjamps dal savê. La Filologjiche e à volût dedicâi al professôr Cornelio Cesare Desinan, mestri in cheste materie, une racuelte di studis in so onôr, par ringraziâlu pal so lavôr. Il volum al cjape dentri i contribûts di 37 studiôs e al rapresente dutis lis diviersis stradis di ricercje che a fasin part de toponomastiche.
- Strolic furlan pal 2011, par cure di Gloria Angeli.
Il Strolegant de Filologjiche al è pront a compagnâ i letôrs dilunc di dut il 2011. Cence distacâsi masse de tradizion, la gnove edizion dal Strolic furlan e presente tantis novitâts, de gnove muse grafiche al teme, leât ai autôrs e ai grups che a fasin musiche in lenghe furlane in dì di vuê.
E pai plui piçui:
San Nicolau e il Krampus Piçul, test di Giovanna Zordan e disens di Barbara Jelenkovich.
Inte gnot dai 5 di Dicembar, cuant che il soreli al va a platâsi daûr des monts, a vegnin fûr dai boscs de Val Cjanâl i Krampus, i diaui magjics che dome San Nicolau, cul so podê, al rive a tignî cuiets. Di chest rituâl antigon e cjape pît une storie tenare scrite in cuatri lenghis (talian, todesc, sloven e furlan) e plene di biei disens, che e fâs vignî iniment dut l'incjant dal Nadâl e dal mont dai fruts.
O podês cjatânus a Palaç Mantica, in vie Manin 18 a Udin, tai nestris sîts di Gurize, Pordenon e Tumieç e tes miôr librariis.
Us invidìn a visitâ il book shop sul nestri sît internet www.filologicafriulana.it
La Societât Filologjiche Furlane e presente ai socis e ai amîs i miôr auguris di Bon Nadâl e Bon principi dal 2011
Par informazions:
Societât Filologjiche Furlane "G. I. Ascoli"
Vie Manin, 18 - 33100 Udin
tel. 0432 501598
fax 0432 511766
info@filologicafriulana.it - www.filologicafriulana.it