Bon Nadâl cu la Filologjiche

Lis nestris novitâts editoriâls

• La meglio gioventù, dissens di Davide Pascutti/Dimitri Fogolin, test di Flavio Massarutto.
  

  Un fumut che al conte une schirie di fats capitâts a San Vît dal Tiliment subit dopo finide la vuere, cuant che il zovin zornadîr Egisto i cor daûr a la biele Brune, che e lavore te filande, intune storie jenfri sium e realtât. Par capî miôr il contest, a son stadis zontadis lis notis storichis dal teritori di San Vît, metudis adun di Pier Giorgio Sclippa.

• La cucina mitteleuropea a Gorizia, par cure di Anna Laura Russian e Roberto Zottar.

  I ats de Cunvigne nazionâl de Accademia Italiana della Cucina - Delegazione di Gorizia. A vegnin cjapâts sot esam i diviers aspiets de gastronomie gurizane, lant a cognossi lis tradizions tal disvilup e te contaminazion dai mangjâs. Par dâi ancjemò plui valôr al volum, no mancjin une schirie di ricetis.

• Sarvignan, par cure di Ferruccio Tassin e Carla Marcato.

  Ogni an, te ocasion dal so Congrès sociâl, la Societât Filologjiche Furlane e publiche un volum monografic su la localitât che i à dât il bon acet. Tal libri si presente il teritori di dut il mandament di Sarvignan. Si puedin cjatâ no dome i contribûts di incuadrament gjenerâl, ma ancje saçs su aspiets gnûfs, che no son stâts tratâts in altris ocasions. Il lavôr, ae fin, al fâs viodi la ricjece di un ambient che al è un puint di rivocs mediteranis, orientâi e de Europe centrâl.

• Scais, contis e... , di Vico Bressan.

  Une racuelte di scrits dal autôr, origjinari di Flumisel, publicâts sui Strolics, o inedits che a vegnin fûr dal archivi privât de famee Bressan. Lis contis curtis (o "scais") a son câs sucedûts pardabon e a puartin messaçs che a son la memorie storiche des ints che a son a sta di ca e di là dal Lusinç. 

• Strolic furlan pal 2013, par cure di Gloria Angeli.

  Il Strolegant de Filologjiche al è pront a compagnâ i letôrs dilunc di dut il 2013. Cence distacâsi masse de tradizion, la gnove edizion dal Strolic furlan e presente tantis novitâts, come la gnove muse grafiche fûr par fûr a colôrs e il teme leât ai osservatoris astronomics e ai grups di astrofii di dute la regjon.

E pai plui piçui:

• Il mont che si ribalte, scrit e ilustrât di Miriam Pupini.
  Storiute piçule piçule par imparâ a rispietâ la nature sparagnant energjie eletriche. Un librut pe infanzie in trê lenghis dulà che la protagoniste e je la mariutine Mariute che, in cheste gnove venture, e mande un messaç sul sparagn, insegnant che la energjie eletriche e je une vore impuartante. 

Nus cjatais a Palaç Mantica, in vie Manin 18 a Udin, tes nestris sedis di Gurize, Pordenon e Tumieç o tes miôr librariis.

Visitait il book shop tal nestri sît www.filologicafriulana.it

La Societât Filologjiche Furlane e augure a ducj i siei socis e amîs

Bon Nadâl e Bon Principi pal 2013

Par informazions:  
Societât Filologjiche Furlane "G. I. Ascoli"
Vie Manin, 18  - 33100 Udin
tel. 0432 501598
fax 0432 511766
info@filologicafriulana.it - www.filologicafriulana.it