Doi puescj in Filologjiche pal servizi civîl nazionâl
Lis domandis a àn di rivâ dentri des 2 di dopodimisdì, dai 21 di Otubar dal 2011
L’Ufici Nazionâl pal Servizi Civîl al à dât fûr l’avîs pe selezion di 137 volontaris di inviâ vie pal an 2012 tai progjets di servizi civîl te Regjon Friûl Vignesie Julie. Dentri de graduatorie fate buine de Regjon, al è ancje il progjet Comunica la lingua e la cultura friulana 2011, promovût de Societât Filologjiche Furlane, che e met a disposizion 2 puescj.
L'obietîf dal progjet al è di dâur ai zovins selezionâts la cualifiche e lis cognossincis par podê cjatâ e ricognossi lis dibisugnis specifichis dal teritori rivuart une comunicazion valide in lenghe furlane, miorâ la cualitât e il numar dai servizis di informazion ufierts ae comunitât, incressi la domande di comunicazion in lenghe furlane. I volontaris a lavoraran tai setôrs de comunicazion, de segretarie di redazion, de organizazion di events.
Il servizi, che al tacarà cun Fevrâr dal 2012, al durarà dodis mês.
A puedin partecipâ ae selezion i citadins talians, cence distinzion di ses che, te date di presentazion de domande, a vedin disevot agns finîts e no plui di vincjevot. In particolâr, par partecipâ ae selezion in Filologjiche, si domandin almancul la iscrizion a une lauree trienâl o a une lauree specialistiche (a saran tignûts di bon cont i percors di studis in siencis de comunicazion, relazions publichis o cors di lauree parei), la cognossince de lenghe furlane e di une o plui lenghis europeanis, la cognossince de informatiche di base, buinis capacitâts di comunicazion.
La sede dal servizi e sarà la Societât Filologjiche Furlane in vie Manin 18 a Udin.
La domande di partecipazion ae selezion, compagnade de fotocopie di un document di identitât valit e di une schede cui titui culturâi, e varà di jessi spedide o presentade diretamentri ae Societât Filologjiche Furlane vie Manin, 18 – 33100 Udin dentri des 14.00 dai 21 di Otubar dal 2011.
Avîs Servizi Civîl 2011 - Regjon FVG Schede dal progjet Comunica la lingua e la cultura friulana 2011
Par altris informazions e pal discjamâ il model de domande, viôt i sîts www.fvgsolidale.regione.fvg.it e www.serviziocivile.it.
Societât Filologjiche Furlane "Graziadio Isaia Ascoli"
Vie Manin, 18 - 33100 Udin
tel. 0432 501598, fax 0432 511766
info@filologicafriulana.it