Al è stât spostât ai 30 di Lui dal 2007 il tiermin pe presentazion dai lavôrs dal

II.nt CONCORS

“CJANTUTIS PAI FRUTS”

La Societât Filologjiche Furlane e rint public il II.nt  Concors par composizions vocâls e strumentâls pai fruts, viert ai compositôrs di cualsisei nazionalitât.

1. In cheste edizion i Autôrs a àn di presentâ composizions su tescj furlans di libere sielte:

• Categorie A: composizions par “vôs blancje”, o corâl di “vôs blancjis”, par frututs de Scuele de Infanzie e de Scuele Primarie des primis dôs classis, cun o cence compagnament strumentâl. I struments a podaran jessi: il flaut dolç (o altri strument melodic), la ghitare (o altri strument pal compagnament), il piano (o lis tastieris), struments a percussion;
• Categorie B: come previodût inte categorie A, ma cun estension melodiche adate ai fruts plui grancj (lis trê ultimis classis de Scuele Primarie e lis trê de Scuele Secondarie di I° grât).

2. Pal Concors a son previodûts i premis culì segnâts:

• Prin premi inte categorie A € 1.000,00
• Secont premi inte categorie A € 500,00

• Prin premi inte categorie B € 1.000,00
•  Secont premi inte categorie B € 500,00

• Segnalazions: eventuâl publicazion.

3. I lavôrs a varan di jessi inviâts su supuart magnetic (CD o cassete) compagnâts de partidure, cu la categorie segnade, a varan di jessi cence indicazion dal Autôr e a ogni mût no varan di vê nissun element di ricognossiment palês. A varan di jessi marcâts cuntun sproc o une peraule-clâf di ripuartâ suntune buste sigjilade di compagnament. Dentri de buste sigjilade a àn di comparî i riferiments anagrafics (non, cognon, residence e numar telefonic) e une declarazion firmade indulà che si sigure che la vore no je mai stade publicade ni mai eseguide in public. Se un tant nol risultarà vêr al sarà mutîf di esclusion dal Concors e, di oblic, i premis dal câs ricevûts a varan di jessi tornâts indaûr ae Societât.

4. I lavôrs a varan di rivâ in 4 copiis pe partidure e une copie su supuart magnetic te Segretarie de S.F.F. – Vie Manin, 18 – 33100 Udin, no plui tart dal 30 di Lui dal 2007.

5. Su ogni partidure e varà di jessi segnade ancje la durade di esecuzion che, a ogni mût, no à di passâ i 5 minûts.

6. Lis composizions a varan di ripuartâ i tescj leteraris cu la grafie fissade de Regjon FVG e il non dal autôr dal componiment leterari.

7. I lavôrs a saran esaminâts, ancje pe lôr validitât didatiche, di une Jurie nomenade de Presidence de S.F.F. Lis decisions de jurie a son cence apel.

8. Lis risultancis dal Concors a saran pandudis al Congrès de Societât Filologjiche Furlane (ai 30 di Setembar dal 2007).

9. I lavôrs premiâts e, in câs, chei segnalâts, a podaran jessi eseguîts in timps e lûcs sielzûts de S.F.F.

10. La S.F.F. e varà il dirit esclusîf de publicazion a stampe dai lavôrs vincidôrs e, in câs, di chei segnalâts, scrits te grafie uficiâl furlane. Lis riproduzions sucessivis – par cont di altris - a varan di ripuartâ l’autorizazion de S.F.F. e l’indicazion de prime edizion.

11. Cu la finalitât di dâ la massime difusion ai lavôrs, la S.F.F. e podarà concuardâsi cun Istituzions dal teritori par realizâ in coproduzion supuarts stampâts e/o regjistrâts in audio e video e si riserve ducj i dirits. 

12. I lavôrs mandâts no saran tornâts indaûr; a restaran a fâ part de documentazion dal Concors.

Par informazions

• Tel. 0432/501598
• Fax 0432/511766
• Direzion eletroniche: info@filologica friulana.it