ASSOCIAZION “GLI STELLINIANI”

LICEU CLASSIC STATÂL “J.STELLINI”

UDIN

Zardin Grant n.26

Tel.0432 504577

Progjet “Traduzion leterarie des lenghis classichis al furlan”

AVÎS DI CONCORS PAR TRADUZIONS DAL GRÊC E DAL LATIN IN FURLAN

La Associazion “Gli Stelliniani”, in colaborazion cul Liceu Classic “J.Stellini” di Udin e la Societât Filologjiche Furlane, e inmanee la seste edizion dal concors di traduzion dal grêc e dal latin in furlan.

Il compit al è chel di voltâ in furlan un test, presentât inte lenghe origjinarie greche o pûr latine.

Pe traduzion dal grêc si varan dôs categoriis di concors: une dedicade ai arlêfs dal Gjinasi e une a chei dal Liceu; te stesse maniere, pe traduzion dal latin une categorie e je pai arlêfs dai prims doi agns, une altre par chei dai ultins trê agns di scuele.

Regolament

1. Il concors al è viert a ducj i arlêfs dai liceus dal Friûl
2. La partecipazion al concors e à di jessi personâl e no si acetin lavôrs fats insiemit cun altris; si pues partecipâ al concors sedi pe traduzion dal grêc sedi par chê dal latin, a condizion di rispietâ la categorie concorsuâl di apartignince (gjinasi-prins doi agns o pûr liceu-ultims trê agns).
3. I tescj di voltâ si cjatin li des segretariis des scuelis, o pûr si puedin domandâ li de sede di Udin de Societât Filologjiche Furlane, in vie Manin 18, o discjariâ dal sît internet www.filologicafriulana.it.
4. I lavôrs a varan di jessi presentâts in forme anonime, metûts dentri intune buste segnalade cuntun sproc, che al varà di jessi scrit ancje intune buste sierade (e metude dentri de prime), che e vedi dentri lis informazions personâls, il recapit e la scuele li che al studie il concorint; cui che nol rispiete chestis regulis al vignarà scualificât.
5. I lavôrs a varan di jessi mandâts dentri da 30 di Avrîl dal 2008 a cheste direzion: Liceo Classico “J.Stellini” - Concorso di traduzione dal greco e dal latino in friulano, piazza I Maggio 26, 33100 Udine.
6. Pe traduzion si varà di doprâ la koiné uficiâl de lenghe furlane, o pûr ancje une varietât locâl dal furlan, a condizion che cheste ultime e sedi declarade tal sfuei li che si presente la traduzion. Tes sedis de Societât Filologjiche Furlane di Udin, Pordenon, Gurize e Tumieç a son a disposizion manuâi di grafie uficiâl de lenghe furlane.
7. I criteris di valutazion no son dome la ricjece e la justece de lenghe furlane, ma ancje la cualitât de traduzion a la atenzion lenghistiche e gramaticâl ai tescj grêc e latin: la traduzion in furlan no à di jessi, in pratiche, une traduzion dal talian.
8. La Comission Esaminadorie, componude di trê docents dal Liceu “J.Stellini” e di doi esperts di furlan nomenâts de Societât Filologjiche Furlane, a proclamarà i vincidôrs daûr dal so judizi insindacabil. Si proclamarà un vincidôr par ogni categorie; cun di plui, la Comission salacor e segnalarà fin a doi lavôrs par ogni categorie. I vincidôrs e i segnalâts a varan libris par premi. I  tescj miôr a podaran jessi publicâts intes rivistis de Societât Filologjiche Furlane.
9. I nons dai arlêfs vincidôrs e segnalâts, insiemit cu la indicazion dal lûc, de ore e de date de fieste di premiazion, al sarà fat savê par cure de Comission Esaminadorie diretementri aes segretariis des scuelis.
10. Par altris informazions si puedin clamâ i numars 0432 504577 (prof. Stefano Perini) o 0432 580105 (prof. Gabriele Ragogna), o ben viodi sul sît internet de Societât Filologjiche Furlane www.filologicafriulana.it

Culì, si puedin discjariâ i tescj di voltâ

 Traduzion dal grêc in furlan - Sezion Gjinasi-prins doi agns

 Traduzion dal grêc in furlan - Sezion Liceu-ultins trê agns

 Traduzion dal latin in furlan - Sezion Gjinasi-prins doi agns

 Traduzion dal latin in furlan - Sezion Liceu-ultins trê agns