Associazion "Gli Stelliniani”

Societât Filologjiche Furlane

Progjet “Traduzion leterarie des lenghis classichis in furlan”

Avîs di concors par traduzions dal grêc e dal latin in furlan

XI edizion - 2013

La Associazion “Gli Stelliniani” e la Societât Filologjiche Furlane, in colaborazion cul Liceu classic statâl “Jacopo Stellini” di Udin, a inmanein la decime edizion dal Concors di traduzion dal grêc e dal latin in furlan.

Si à di voltâ par furlan un test di autôr grêc opûr latin.

Pe traduzion dal grêc si varan dôs categoriis di concors, une dedicade al gjinasi e une al liceu; te stesse maniere, pal latin si varan dôs categoriis di concors, une pai prins doi agns e une pai ultins trê agns.

REGOLAMENT

1. Il Concors al è viert a ducj i arlêfs dai liceus dal Friûl.
2. La partecipazion al Concors e à di jessi personâl, sicheduncje no si acetin lavôrs di grop; si pues partecipâ o dome a une des dôs sezions (dal grêc e dal latin) opûr a dutis e dôs, a condizion di stâ dentri de categorie concorsuâl di apartignince (gjinasi-prins doi agns o liceu-ultins trê agns).
3. I tescj di voltâ si cjatin li des segretariis des scuelis opûr a Udine li de Societât Filologjiche Furlane (vie Manin 18) o ancje tal sît www.filologicafriulana.it.
4. I lavôrs a varan di jessi presentâts in forme anonime, metûts dentri di une buste cuntun sproc, che al varà di jessi tornât a scrivi ancje intune seconde buste sierade (e metude dentri de prime), cu lis informazions personâls e la direzion di cjase di cui che al partecipe, e cun di plui il non de scuele e la classe frecuentade. Se no si rispietin chestis regulis, o ancje dome une di lôr, si ven metûts fûr dal Concors. 
5. I lavôrs a varan di rivâ dentri ai 30 di Avrîl dal 2013 a cheste direzion: Liceu Classic “Jacopo Stellini” – Concorso di traduzione dal greco e dal latino in friulano, piazza I Maggio 26, 33100 Udine.
6. Pe traduzion dai tescj si varà di doprâ la koiné uficiâl de lenghe furlane, opûr une variant locâl, a condizion che cheste ultime e sedi declarade tal sfuei li che e je la traduzion. Tes sedis de Societât Filologjiche Furlane di Udin, Pordenon, Gurize e Tumieç a son a disposizion manuâi di grafie uficiâl de lenghe furlane.
7. I criteris di valutazion a son, dongje de justece de lenghe furlane, ancje la cualitât tal mût di rindi il test e la atenzion ae gramatiche e a lis peraulis dai tescj grêcs e latins: la traduzion in furlan, ven a stâi, no à di jessi une traduzion dal talian. 
8. La Comission esaminadorie, fate di insegnants dal liceu “Stellini” e di esperts di furlan nomenâts de Societât Filologjiche Furlane, e proclamarà i vincidôrs a sô judizi insindacabil. Si proclamarà un vincidôr par ogni sezion; cun di plui, la Comission e pues segnalâ fin a doi lavôrs par ogni sezion. I vincidôrs e i segnalâts a varan premis in libris. I miôr tescj a podaran jessi publicâts par cure de Societât Filologjiche Furlane e de Associazion “Gli Stelliniani”.
9. Il non dai vincidôrs e dai segnalâts, cun ancje la date e il lûc che si fasarà la lôr proclamazion e premiazion, al sarà fat savê aes segretariis des scuelis par cure de Comissione esaminadorie.
10. Cui che al vûl altris informazions al pues clamâ il numar 0432 580105 (prof. Gabriele Ragogna).

Culì, si puedin discjariâ i tescj di voltâ:

 Traduzione dal grêc in furlan - Sezione Gjinasi

 Traduzion dal grêc in furlan - Sezione Liceu

 Traduzion dal latin in furlan - Sezion Bieni

 Traduzion dal latino in furlan - Sezion Trieni

Societât Filologjiche Furlane "Graziadio Isaia Ascoli"
Vie Manin, 18 - 33100 Udin
tel. 0432 501598, fax 0432 511766
info@filologicafriulana.it
www.filologicafriulana.it