In gracie dal grant sucès otignût cu la prime edizion, la Societât Filologjiche Furlane cu la poie de ARLeF - Agjenzie Regjonâl pe Lenghe Furlane e à inviât la seconde edizion dal Cors pratic di lenghe e culture furlane in linie, su la fonde dai contignûts dal prin volum de golaine “Lenghe e culture” di Maria Chiara Visintin e Gabriele Zanello, dedicât a la formazion lenghistiche dai adults.
I 120 puescj disponibii a son stâts prenotâts in pôcs dîs, tant che conferme dal grant interès par chest gnûf mût di formazion a distance, che al rive in dut il mont li che a son apassionâts de lenghe furlane: i iscrits al cors a son no dome di diviers Paîs europeans, ma ancje de Argjentine e dal Uruguay.
Il cors si davuelç in 10 setemanis di ativitât in modalitât asincrone, su plateforme Moodle, li che a son proponûts piçui videos di introduzion ae storie dal Friûl; piçui videos di spiegazion des regulis di gramatiche; esercitazions di comprension dai tescj e de gramatiche; piçul test finâl par podê passâ ae ativitât sucessive. Al è ativât ancje un forum di discussion cun trê tutors che si alternin te assistence ai iscrits. Cun di plui a son in prevision 3 incuintris su plateforme Zoom, sù par jù di un’ore ognidun, par fâ un detât e une leture e sburtâ l’interazion orâl cul tutor dal cors e cun chei altris corsiscj.
I materiâi didatics a son metûts su Moodle ogni setemane e a restin a disposizion in mût continuatîf, par che i partecipants a puedin davuelzi lis ativitâts dal cors in autonomie e tai oraris miôr.