Come ogni an, aromai dal 1985 in ca, si vierzin i cors pratics di lenghe e culture furlane inmaneâts de Societât Filologjiche Furlane parie cun diviersis aministrazions comunâls o ben clapis culturâls dal Friûl.
Stant la varietât des cuistions tratadis, cui che al frecuente i cors pratics de Filologjiche - biel imparant a lei e a scrivi par furlan - al pues ancje cognossi o ben tornâ a scuvierzi lis lidrîs culturâls dal teritori.
I comuns disponibii a inviâ il cors cjase lôr a son cetancj, si che, in fuarce de lôr sensibilitât, la Societât e je in stât di vierzi vincjetrê cors sparniçâts in dut il Friûl, di Soreli jevât fin ae Livence.
Cussì, dilunc dal mês di zenâr si ‘nt vierzaran inmò altris intai dîs e lûcs puartâts culì ret:
- Cjassà - di vinars, 20.30 - 22.30
- Cjastelgnûf - vinars ai 26 di zenâr, 17.00-19.00 li de Sale dal Consei
- Cjavaç - al tache martars ai 13 di fevrâr li de Sale dal Consei
- Çarvignan - ogni miercus des 15.00 aes 17.00, li de biblioteche
- Cividât - al tache martars 23 di zenâr aes 18.00 li de biblioteche
- Cosean - joibe ai 25 di zenâr, aes 18.00, li dal Auditorium comunâl
- Gurize - al tache lunis 12 di fevrâr, aes 18.00, sît de Societât Filologjiche Furlane
- Lucinîs - al tache miercus 7 di fevrâr aes 20.00
- Manià, al scomence sabide ai 3 di fevrâr des 15.00 aes 17.00. li de ex biblioteche
- Merêt di Tombe - ogni martars des 20.30 aes 22.30
- Mueç - al tache sabide ai 10 di fevrâr des 16.00 aes 18.00, li de Biblioteche. Il cors al è di 6 lezions
- Muimans - al scomence joibe 25/01 aes 20.00
- Morâr - al scomence il 13/02, 18.30-20.30 li de ex scuele elementâr "Bergamo"
- Palme, il lunis, 20.30-22.30, li dal Polifunzional di San Marc, vie Scamozi, 3° plan
- Pasian di Pordenon - al tache vinars 9 di fevrâr, 18.00-20.00
- Pavie - al tache martars 30 di zenâr aes 20.30 li de sale dal consei di Lauçac
- Pordenon - al tache martars 6 di fevrâr, 18.00-20.00, sît de Societât Filologjiche Furlane
- Puçui - al scomence miercus 17 di zenâr aes 17.30, li de Biblioteche civiche
- San Zorç di Noiâr - al scomence lunis 15 di zenâr aes 20, Palaç Comunâl, prin plan
- San Zuan dal Nadison e Cuar di Rosacis, al tache martars 6 di fevrâr, 20.30-22.30 li de Sale dal Consei
- San Vît dal Tiliment - al scomence sabide 13 di zenâr aes 15, Sale Europa - Municipi
- Spilimberc - al scomence vinars 9 di fevrâr, des 17.00 aes 19, Aule Grande dal Centri Studis
- Udin - sît de Societât Filologjiche Furlane, al scomence miercus 17 di zenâr aes 18.
Lis lezions - dodis, ognidune di dôs oris - a son viertis a di ducj, cence nissun limit ni di etât ni di titul di studi, tant plui che nol covente che i frecuentants a savedin za il furlan.
I argoments parferîts a son: leture dai autôrs plui rapresentatîfs de leterature furlane, elements di storie dal Friûl cun riferiments ae storie taliane e europeane, gjeografie regjonâl, gramatiche, sintassi, grafie de lenghe, esercitazions pratichis di leture e scriture, elements di storie de art e des tradizions popolârs.
Si ricuarde che i cors a son ativâts cu la poie de Agjenzie Regjonâl de Lenghe Furlane – ARLeF.
Pes informazions e, se dal câs, pe iscrizion, si pues clamâ lis bibliotechis o i uficis dai comuns nomenâts parsore, o ben ancje la Societât Filologjiche Furlane (Rif. Elena De Sanctis, tel. 0432 501598, formazione@filologicafriulana.it), Pordenon (tel. 0434 522323), Gurize (0481 533849) intai oraris di vierzidure.