Raffaele Serafini, cu lis contis racueltis sot dal titul Cryptofriûl, al à vinçût la 42.e edizion dal Premi in lenghe furlane "San Simon" di Codroip. E je la cuarte volte che il scritôr di Sclaunic di Listize, ostîr di Contecurte, al cjape il premi leterari plui innomenât dal Friûl.
La cerimonie di premiazion si è davuelte a Codroip come par tradizion te dì di San Simon, ai 28 di Otubar. La jurie componude di Gabriele Zanello (president), Antonella Sbuelz e Walter Tomada e à assegnât a la unanimitât il premi a la vore di Serafini, «un viaç in plui dimensions dentri dal Friûl dal Nûfcent, là che i events e i personaçs storics si misclicin cu la fantasie e cu la invenzion».
La racuelte di contis e je editade de Societât Filologjiche Furlane, che dal 2017 e publiche i lavôrs vincidôrs dal San Simon (viôt i detais tai links in cheste pagjine):
2017 - Raffaele Serafini, Contis sot spirt
2018 - Gianluca Franco, Silvie te catedrâl di Taragone
2019 - Raffaele Serafini, Bisest
2020 - Gianluca Franco, See the Sky about to Rain - Balade pai timps di ploie
2021 - Raffaele Serafini, Cryptofriûl