Fasìn un zûc. Fasìn fente di montâ parsore de machine dal timp e lâ indaûr… indaûr… 2018… 2017… 2016… ancjemò plui indaûr! … 2010… 2000… ancjemò, ancjemò plui indaûr!... 1990… 1985… 1982… fers! E je ore di dismontâ!
O sin in plene Istât. In Spagne. Là jù si viôt un cjamp sportîf indulà che si zuie la finâl de cope dal mont di balon! Ma cui isal daûr a zuiâ? Cualis sono lis dôs scuadris? Ve, une e jê la Gjermanie e chê altre e jê… la Italie! O rivìn a cognossi cualchi zuiadôr… Zoff in puarte… e dopo Tardelli… Oriali… e Rossi, chel che al è bon di fâ cetancj goi!
I zuiadôrs a tachin a lâ daûr dal balon, lu pochin di ca e di là, fin che l’arbitri cul sivilot al segnale la fin de partide: la Italie e à vint par 3 a 0 e il telecronist al berghele: “Campions dal mont! Campions dal mont! Campions dal mont!”
Ma cui isal il Mister cussì brâf di puartâ la Italie devant di dutis chês altris scuadris dal mont? Al è un furlan. Il so non? Enzo. Il so cognon? Bearzot.
Ancje lui al è stât un zuiadôr tal timp passât e al à fat tantis partidis cun tantis scuadris. Dopo al à tacât a fâ l’alenadôr cun chei biei risultâts che o vês viodût montant te machine dal timp.