Enzo Bearzot al reste une des gloriis plui bielis dal balon furlan.
Al jere nassût a Vuanis di Dael tal 1927 e al veve tacât a zuiâ te scuadre dal sô paîs. La sô cariere lu veve puartât tes plui grandis scuadris di serie A e ancje in nazionâl. Cuant che al finì la ativitât di zuiadôr di balon al deventà alenadôr te serie C, po dopo al fo clamât tant che tecnic federâl tai mondiâi dal 1970 e dal 1974.
Plui indenant, tal 1977, al à cjapât sù la responsabilitât de nazionâl. Al jere un om che al lavorave cun costance e impegn e al saveve meti dongje un clime di scuadre strabon.
Dopo dai mondiâi di Argjentine che al puartà fûr cuntun cuart puest, ai mondiâi di Spagne dal 1982 al fasè il miracul di puartâ la nestre nazionâl a concuistâ cun determinazion la cope dal mont, dopo di une finâl impussibil di dismenteâ cuintri la Gjermanie finide par 3-1 (inte foto, la scuadre i fâs fieste dopo de vitorie).
Bearzot al restà simpri une persone a la man e al le indenant cun serietât, coerence e grant ecuilibri, intun mont svoladi e balarin tant che chel dal balon.
Al murì ai 21 di Dicembar dal 2010 a Milan.