Cambiament ae presidence de Societât Filologjiche Furlane: il consei gjenerâl de Societât, clamât dongje vinars ai 12 di Avrîl te sede di Palaç Mantica a Udin al à elezût ae presidence Federico VIcario.
Federico Vicario, 47 agns, docent di lenghistiche ae Universitât di Udin, , al sostituìs Lorenzo Pelizzo che al à vuidât la Filologjiche fin dal 2001. Tall cors dal consei diviers a son stâts intervents dai conseîrs che a àn volût esprimi il lôr ringraziament pal lavôr dal president Pelizzo: un preseament che al è stât fat bon ae unanimitât, di ricognossi a Pelizzo la presidence onorarie de Societât.
Pelizzo, mutivant la sô sielte, al à intindût rimarcâ i cetancj impuartants obietîfs di chescj ultins agns: lis voris di ristruturazion di Palaç Mantica, sierâts ae fin dal mês di Novembar, il riconossiment de Societât te schirie dai Istitûts culturâls dal Ministeri talian pari Bens e lis Ativitâts Culturâls (unic istitût dal Friûl Vignesie Julie), la cressite d biblioteche sociâl e dal numar des ativitâts culturâls, formativis e sientifichis puartadis indenant in chescj agns.
Un rinovât impegn che al continue cumò sot la vuide di Federico Vicario e cul gnûf comitât diretîf che al è stât elezût daspò de presidence. Il gnûf comitât al vignarà convocât dentri di un mês, pe nomie dal Ufici di Presidence (formât di 4 vicepresidents - pe Cjargne, pal Friûl Centrâl, di Soreli a mont e di Soreli jevât, dal tesorîr e dal segretari).
Vicario al devente duncje il 14.m president te storie de Societât Filologjiche Furlane: une schirie tacade cun Giovanni Lorenzoni (1919 - 1920) e lade indenant cun Ugo Pellis (1920 - 1923), Ercole Carletti (1923 - 1924), Giacomo di Prampero (1924 - 1925), Pier Silverio Leicht (1925 - 1945), Michele Gortani (1945 - 1948), Giuseppe Del Bianco (1948 - 1954), Tiziano Tessitori (1954 - 1963), Guglielmo Pelizzo (1963 - 1974), Bruno Cadetto (1975 - 1981), Alfeo Mizzau (1981 - 1995), Manlio Michelutti (1995 - 2001) e, par finî, Lorenzo Pelizzo (2001 - 2013).