Gnûfs cors pai mestris e inziativis pe scuele furlane

an scolastic 2009/2010

Pal an scolastic 2009/10 la Societât Filologjiche Furlane e propon une schirie di iniziativis pensadis pai mestris e pal mont de scuele furlane:

• cors di formazion e inzornament di lenghe e culture regjonâl pai insegnants, inte suaze dal progjet poiât dal Servizi Associazionisim e Volontariât de Regjon Friûl Vignesie Julie LINGUA 2008. I cors si tignaran sul teritori di Otubar a Dicembar dal 2009 e a rivuardaran chestis materiis: lenghe e culture regjonâl, linguistiche, leterature, musiche, teatri e tradizions popolârs dal Friûl. Par informazions: Ufici Formazion de Societât Filologjiche Furlane (dot.e Elena De Sanctis, tel. 0432 501598 int. 3, formazione@filologicafriulana.it).

• servizis di consulence didatiche. I esperts de Societât a son disponibii, daûr apontament, a conseâ i docents su la preparazion e la metude in vore dai progjets didatics, ancje rivuart la scriture te grafie uficiâl de lenghe furlane. Par informazions: Ufici Formazion de Societât Filologjiche Furlane  (dot.e Elena De Sanctis, tel. 0432 501598 int. 3, formazione@filologicafriulana.it).

• racuelte di materiâl didatic. La Societât Filologjiche Furlane e cjape dentri te sô biblioteche centrâl di Udin lis esperiencis didatichis (volums, fassicui, dispensis, cd, dvd, cassettis audio e video …) realizadis des scuelis tes oris di lenghe e culture furlane. Il fin al è chel di meti a disposizion dai insegnants e di ducj chei che a lavorin te scuele i imprescj di podê doprâ par gjavâ fûr materiâi e esemplis di ativitâts didatichis par furlan.
  Par insiorâ simpri di plui cheste racuelte, la Societât e domande ai mestris e ai Istitûts di puartâ in biblioteche une copie dai materiâi realizâts vie pai ultins agns scolastics. La SFF, che e ringrazie pe colaborazion, e mandarà ai Istitûts lis publicazions su la culture regjonâl gjavadis dal propri catalic. In biblioteche si pues cjatâ la liste dai materiâi tirâts dongje fin cumò; i titui a son sul catalic di consultâ sul sît www.filologicafriulana.it/opac. 
  Par informazions: Biblioteche de Societât Filologjiche Furlane (dot.e Katia Bertoni, tel. 0432 501598 int. 2, biblioteca@filologicafriulana.it).