“Noaltris che o difindìn la lenghe taliane o difindìn ancje lis lenghis di minorance”: cun chestis peraulis il professôr Paolo D’Achille, president de “Accademia della Crusca”, al à dât il benvignût a la Societât Filologjiche Furlane, che ai 22 di Zenâr e à vût l’onôr di jessi ospitade a Florence, inte sede de Academie, par presentâ la racuelte dai ats de cunvigne “I 150 anni dei Saggi ladini. Graziadio Isaia Ascoli tra storia e attualità”.
La cunvigne si jere davuelte tal Novembar dal 2023 par ricuardâ i 150 agns de jessude dai innomenâts saçs di Graziadio Isaia Ascoli che tal 1873 a vierzevin la riviste “Archivio Glottologico Italiano” fondade dal stes lenghist gurizan: pe prime volte, a traviers dal esam de fonetiche des varietâts alpinis, e vignive ricognossude la identitât de lenghe furlane e di chês altris fevelis ladinis.
«I “Saggi ladini” – al à dit il dean de Filologjiche Federico Vicario, che al à viert e al à coordenât la cunvigne di Florence – a son une opare di impuartance fondamentâl pe definizion dai caratars lenghistics dal furlan, de sô identitât e de sô posizion intal mont neolatin. La Societât Filologjiche Furlane e je intitulade a Ascoli e e puarte indevant, di cuant che e je stade fondade tal 1919, l’impegn pal studi e pe valorizazion dal complès des varietâts lenghistichis de nestre regjon».
Al à fevelât Angelo Variano de Universitât dal Friûl par spiegâ la struture dai "Saggi ladini", biel che Giampaolo Salvi al è intervignût su la cuistion ladine. Il compit di presentâ il volum i è tocjât a Carla Marcato, curadore insiemit cun Vicario. I contribûts cjapâts dentri dal volum a son ducj di specialiscj cualificâts, studiôs di prin plan di lenghistiche e dialetologjie taliane; a presentin i contignûts e la fortune de opare, a fevelin di cemût che si è disvilupade la materie e de atualitât dal pinsîr di Ascoli pai studis lenghistics modernis.
Inte foto, di man çampe, Angelo Variano, Federico Vicario, Paolo D’Achille, Giampaolo Salvi.