Il 5 par mil ae Societât Filologjiche Furlane

Cu la presentazion des declarazions dai redits des personis fisichis che e vignarà fate chest an, pai redits 2006, si podarà meti in vore il dirit di destinâ il cinc par mil de proprie IRPEF a pro des Associazions e Fondazions ricognossudis, là che e jentre ancje la Societât filologjiche furlane.

Us ricuardìn che fâ cheste sielte nol vûl dî paiâ di plui tassis, ma fâi savê al Stât che la cuote dal cinc par mil dal propri redit, che e larès si di no a finîle tes sôs cassis, e ven invezit metude fûr - in chest câs - a pro de Societât Filologjiche Furlane.

Cemût fâ par dâ il cinc par mil ae Societât Filologjiche Furlane? Al covente firmâ un dai cuatri scomparts metûts di pueste tal model di declarazion doprât (Mod. 730/1-bis redits 2006, Unic personis fisichis 2007, Model integratîf CUD 2007), pal apont chel intitulât Sostegno del volontariato, delle organizzazioni non lucrative di utilità sociale, delle associazioni di promozione sociale, delle associazioni e fondazioni e segnâ in chel spazi stes il codiç fiscâl de Societât Filologjiche Furlane che al è 800 105 103 05.

Ai Socis, ur domandìn di sparniçâ la vôs in famee e ancje tra amîs e cognossints che in chest mût si pues judâ la Societât Filologjiche Furlane. E je une maniere par dâ pardabon une man, cence cjamis di sorte, a un Ent che di passe otante agns al strussie a pro de tutele e valorizazion de lenghe e culture furlane.