Il 5 par mil ae Societât Filologjiche Furlane
Cu la presentazion des declarazions dai redits des personis fisichis che e vignarà fate chest an, pai redits 2013, si podarà meti in vore il dirit di destinâ il cinc par mil de proprie IRPEF a pro des Associazions e Fondazions ricognossudis, là che e jentre ancje la Societât filologjiche furlane.
Us ricuardìn che fâ cheste sielte nol vûl dî paiâ di plui tassis, ma fâi savê al Stât che la cuote dal cinc par mil dal propri redit, che e larès si di no a finîle tes sôs cassis, e ven invezit metude fûr - in chest câs - a pro de Societât Filologjiche Furlane.
Cemût fâ par dâ il cinc par mil ae Societât Filologjiche Furlane?
Al covente firmâ il scompart metût di pueste tal model di declarazion doprât (Mod. 730/1 redits 2013, Unic personis fisichis Mini 2014, periodi di impueste 2013, Model unic Personis fisichis 2014 periodi di impueste 2013, CUD 2014), intitulât Sostegno del volontariato e delle altre organizzazioni non lucrative di utilità sociale, delle associazioni di promozione sociale e delle associazioni riconosciute che operano nei settori di cui all'art. 10, c. 1, lett a), del D. Lgs. n. 460 del 1997 e segnâ in chel spazi il codiç fiscâl de Societât Filologjiche Furlane che al è 800 105 103 05.
Ai Socis, ur domandìn di sparniçâ la vôs in famee e ancje tra amîs e cognossints che in chest mût si pues judâ la Societât Filologjiche Furlane. E je une maniere par dâ pardabon une man, cence cjamis di sorte, a un Ent che di scuasi 90 agns al strussie a pro de tutele e valorizazion de lenghe e culture furlane.
Cinc par mil ae Filologjiche: no us coste nuie, ma nus jude